Atu Sosa Osan-Mean ! Deskunhesidu Na’in-2 Bosok & Hadau Osan 3.000 Iha Manatutu
Imajem: Manuel da Silva de Oliveira no Haji Jaya iha postu administrativu Manatuto Villa, Munisipiu Manatuto, 02/05/2026. Foto: Conzita Mota
SAPNewsTL, Díli : Deskunhesidu na’in rua bosok no hadau osan 3.000 husi Manuel da Silva de Oliveira no Haji Jaya iha postu administrativu Manatuto Villa, Munisipiu Manatuto.
Conzita Mota – Sapnews Pro
Vítima Manuel da Silva de Oliveira informa katak antes ne’e sira halo komunikasaun atu hasoru malu no fasilita sosa osan mean, maibe wainhira to’o iha Manatuto, deskunhesidu ne’e bosok no hadau osan husi nia no halai.
“Antes ne’e nia kontaktu mai dehan nia iha ema ne’ebe nia konhese fa’an osan mean iha Manatuto. Ha’u ho patraun sai husi Dili tuku 17:00 no to’o tuku 19:00, ami konsege hasoru no ko’alia ba malu, sira hadau osan ne’e iha tuku 20:00 liu”. Informa Manuel da Silva de Oliveira ba SAPNews iha Manatuto, 02/05/2026.
Oliveira konta, hafoin hasoru malu deskunhesidu ne’e dehan “imi fo osan mai, husik ha’u mak ba sosa, imi hein iha ne’e, tauk imi mak ba sosa, ema baku imi. Tamba ita bo’ot nia patraun ema Indonesia”. Nia sublinha
“Nune’e, Ha’u hatan ita nain rua ba hotu. Maibe deskunhesidu ne’e hatan ba nia dehan husik ha’u mak ba tanba ha’u rai-na’in iha ne’e, ha’u konhese diak sira”.
Vítima ne’e dehan, wainhira nia sei hasai hela osan rihun tolu hosi pasta laran, deskunhesidu ne’e hadau no motorista ne’e tula nia halai ho motor Xapa Matríkula X-4454.
“Ha’u foin hasai osan $3.000, seidauk fo ba maun ne’e, maun ne’e hadau lori halai kedas. Ami atu duni tuir mos la bele tanba rai-kalan ona”.
hafoin akontesimentu vítima na’in rua ba kedas esquadra Polisia Nasional Timor-Leste (PNTL) Manatutu Villa hodi hato’o keixa, nune’e bele buka tuir deskunhesidu refere tanba sira hamate ona sira-nia númeru kontaktu.
