PM Interinu Assanami Konsidera Lu Olo Lider Estadista, Nia “Mehi & Luta Iha Nafatin Povu Nia Fuan”
Imajem : Primeiru Ministru Interinu Mariano Assanami Sabino hasoru Eis Presidente Repúblika Francisco Guterres Lu Olo iha Aeroportu, molok ba hala’o tratamentu iha Malasia. Foto : Media VPM
SAP News TL, Díli : Primeiru Ministru Interinu, Mariano Assanami Sabino ho laran triste hato’o sentidu kondolénsia ba família, FRETILIN & povu Timor-Leste ne’ebe lakon Presidente Francisco Guterres Lu Olo iha loron 21 Junhu 2026.
“Ho laran triste ne’ebe kle’an, ha’u hato’o kondolénsia profundu ba família enlutada, ba família FRETILIN no ba povu tomak Timor-Leste tanba partida eterna husi Sua Exelénsia Dr. Francisco Guterres Lú-Olo”. Hakerek PM Interinu Mariano Assanami iha nia pajina ofisial. Dili, 22/06/2026.
Timor-Leste ohin lakon tan Patriota ida, Líder ida no Estadista ida ne’ebé durante nia moris tomak dedika nia-an tomak ba luta libertasaun nasional, ba dame, unidade no dezenvolvimentu nasaun.
Ninia partida husik mamuk ida ne’ebé todan ba povu tomak. Maibé ninia servisu, ninia lideransa no ninia sakrifísiu ba rai ne’e sei hela nafatin iha memória no konsiénsia nasaun nian.
Saudozu Lu Olo nu’udar Prezidente FRETILIN, eis-Prezidente Repúblika Demokrátika Timor-Leste, Prezidente Asembleia Konstituinte no eis-Prezidente Parlamentu Nasionál, Dr. Francisco Guterres “Lú-Olo” marka ona fatin ida ne’ebé importante iha istória Timor-Leste.
Ninia kontribuisaun ba ukun-an, soberania no konsolidasaun demokrasia sei la haluha ba nafatin.
“Iha momentu lutu ida-ne’e, ami hamutuk ho família no povu tomak hodi fó omenajen ikus ba líder ida ne’ebé nia moris tomak dedika ba povu no nasaun. Ita husik ona ami, maibé ita nia mehi, ita nia luta sei moris nafatin iha povu Timor-Leste nia fuan”. Nia hakerek
“Nasaun ida-ne’e sei la haluha ita. Povu ida-ne’e sei la haluha ita. Istória ida-ne’e sei la haluha ita. “Hakmatek iha dame eterna, Saudozu Camarada Lú-Olo”
Video ida-ne’e sai hanesan memória ikus ida husi Saudozu Francisco Guterres “Lú-Olo”, bainhira akompana husi Vice-Primeiru Ministru iha Aeroportu Internasionál Presidente Nicolao Lobato, antes viajen ba Kuala Lumpur, Malázia, hodi hala’o tratamentu saúde intensivu iha Ospitál Prince Court. La iha ema ida hatene katak momentu ida-ne’e sei sai despedida ikus entre líder ida ne’ebé dedika nia moris tomak ba Povu no Nasaun.
