Aban, Atleta Na’in 11 Aranka Ba China ! Husu Povu Nia Orasaun

SAPNewsTL, Dili: Delegasaun Timor-Leste (TL) husi Komite Paralimpiku Nasional Timor-Leste (sigla portuges CPNTL) nain-25 inklui atleta paralimpiku nain-11 sei aranka ba Hangzhou, China iha loron aban, 15 fulan outubru 2023 kompete Asian Para Games 2023.

“Ita nia Atleta paralimpiku nain-11 ho ofisial sira sei aranka ba Hangzhou, China iha loron 15 fulan outubru 2023 kompete Asian Para Games 2023, tan ne’e husu ba povu Timor-Leste halo orasaun ba sira halo viajen no fila fali mai Timor-Leste ho isin diak nafatin”, dehan xefi komisaun organizador Aniceto Berlelo ba jornalista sira liu husi konferensia imprensa iha edifisiu CDTL Caicoli, Dili sexta (13/10/2023).

Aniceto hatutan,Orariu ba atleta sira nia jogu sei bazeia ba sira nia teknikal meeting iha loron 16 ho loron 18 fulan outubru 2023 ho abertura Asian Para Games 2023 iha loron 22 fulan outubru 2023 mak sei determina atleta sira kompete iha sa loron tanba atleta sira sei aranka ba Hangzhou, China iha loron 15 fulan outubru no fila iha loron 30 fulan outubru 2023.

Nia informa, sira hakarak fo agradese no obrigadu ba IX governu liu husi Ministério Juventude Desporto Arte Cultura (MJDAC) fo apoiu finanseiru ba atleta sira husi preparasaun to’o kompete Asian Para Games 2023

Nune’e sira fiar katak atleta sira hamutuk ho treinador no ofisial sira durante treinu ne’e sira sei lori rezultadu diak mai Timor-Leste kompete ho nasaun 45 tanba ida ne’e esperansa boot ida husi CPNTL

“Bazeia ami nia preparasaun durante loron 49 iha Kazerna ne’e ami prontu kompete Asian Para Games 2023 maibe ami la promete hetan medalla maibe ami kompete mak ita hare’e depende sorte tanba ita sei kompete ho atleta sira husi nasaun 45 mai esperansa hotu hakarak hetan medalla ba idak-idak nia nasaun”,

Iha sorin seluk, treinador para tenis meza Rogerio Tadeu Cabral dehan, nia atleta sei la lakon deit maibe sei manan atleta husi nasaun balun maibe lori medalla mai Timor-Leste jogu hotu mak hare’e

“Atleta sira halo preparasaun mais avansadu durante loron 49 tanba ha’u nia atleta nain lima ne’e iha ona esperiensiadurante ne’e hau nia atleta sira lori medalla osan mean ho metan mai Timor-Leste, sira sei aranka ba Hangzhou, China kompete ho atleta sira mai husi nasaun 45 maibe hau fiar katak hau nia atleta sira sei la lakon deit sei manan nasaun balun maibe atu lori medalla mai Timor-Leste mak ita seidauk hatene hein jogu hotu tiha mak ita hare’e”, tenik Rogerio

Reportajen: Augusto dos Santos