Angelo: Problema Iha Treinador Rezulta Prestasaun Atleta Nasional Taekwondo Tun
SAPNewsTL, Dili: Fundador ho Eis Prezidente Federasaun Taekwondo Timor-Leste (FTTL) Angelo Neves hatete, prestasaun ba atleta nasional taekwondo iha jogu internasional tun tanba problema iha treinador.
“Prestasaun atleta selesaun nasional taekwondo Timor-Leste monu tanba federasaun la iha sistema diak promove atleta futuru jerasaun foun sira no problema iha treinador tanba treinador selesaun nasional tenki foku ba treinu atleta selesaun nasional deit para oinsa bele halo atleta sira hetan prestasaun diak,”
“La’os sai mos treinador klube ne’e otomatikamente la iha impasialidade atu hili atleta tanba nia hili deit nia atleta para hodi bele promove no hasa’e klube nia naran la hare’e ona atleta diak husi dojan sira seluk iha Dili no munisipiu sira maski atleta husi dojan sira seluk mos diak barak”, dehan fundador ho Eis Prezidente FTTL Angelo Neves ba jornalista SAPNewsTL iha Bairro Formosa, Dili kuarta, (06/09/2023).
Fundador ne’e hatutan, FTTL atu hetan atleta diak sira liu eventu sira tanba iha eventu sira hetan atleta barak kompete, tuir lolos estrutura FTTL atual iha programa ka planu ba prestasaun no estratejia motiva atleta sira ho teknika foun para atleta sira iha mudansa diak liu tan
“Prepara atleta sira bele hetan prestasaun diak liu tan maibe agora ema hotu hare’e prestasaun ba atleta taekwondo tun liu no naran monu tanba manajementu lideransa federasaun taekwondo la iha inisiativa promove maibe hamate fali”. Nia kestiona
Nia akresenta, pratikamente atleta nasional tenki istima sira ho diak tanba sira ne’e eroi nasaun liu husi atividade taekwondo rasik maibe agora la iha imparsialidade ba hili atleta sira entaun atleta balun muda fali ba modalidade seluk akontese duni foin daudauk dojan tomak ida muda tanba iha “pilih kasih” no la iha transparansia husi treinador selesaun nian
Angelo informa, treinador selesaun nasional Master Kim agora ne’e nia kunese mos antes nia mai Timor, nia buka ona informasaun hodi husu master sira iha Korea Sul, nune’e Master Kim sai husi militar tama ba “Taekwondo Peace Corp” depois haruka mai Timor-Leste atu fo treinu ba membru F-FDTL sira laos atu kaer selesaun nasional Timor-Leste
“Tanba nia background laos eis atleta, oinsa nia bele kaer atleta atu ba prestasaun, foin daudauk lori atleta Ana da Costa ba hetan medalla osan mean iha Pakistan ne’e try out laos kompetisaun internasional tanba laos kompete ho atleta internasional maibe ho atleta dojan kapital nian”. Nia tenik
Nia salienta tan, durante tinan 19 husi 2001 to’o 2020 nia kaer federasaun hodi entrega fali ba federasaun ba estrutura foun ho espetativa atu sira dezenvolve sai diak liu maibe sai at liu tan
Foin daudauk atleta rezigna husi selesaun nasional mos sira bolu fali sai fali atleta nasional no la treinu tan ba kompete iha Sea Games 2023 iha Cambodia, tan ne’e treinador hanesan rezigna an ona tanba la iha kapasidade lori atleta ba prestasaun diak
“Estrutura atual FTTL daudaun ne’e kontinua hatudu diak kontinua uluk nian no realiza saida mak estrutura anterior sira la konsege halo maibe agora sira mai ho programa ketak depois hare’e hatudu prestasaun ka lae”. Nia dúvida
Fundador ne’e hatete tan, daudaun ne’e mos FTTL la halo transparansia ba fundador sira kona ba apoiu mai husi governu no atleta sira ezame nian maibe federasaun tenki hatene katak fundador ne’e nain estrutura atual FTTL ne’e hanesan jestor hetan konfiansa deit maneja fundu internal ho external para dezenvolve federasaun hetan prestasaun diak iha jogu internasional sira
Prestasaun atleta sira tun daudaun ne’e, fundador sira sei tur hamutuk deside liu husi halo evaluasaun no avaliasaun hamutuk ho estrutura atual FTTL liu husi kria enkontru extraordinariu ida iha tinan para hare’e frakeza ne’ebe iha hodi buka solusaun no salva modalidade Taekwondo ho prestasaun diak