Inaugura Laboratóriu Komunikasaun Sosial, Kardeal Husu Estudante Sai Sabor Katóliku

SAPNewsTL, Dili: Hafoin hala’o inaugurasaun ba laboratorium eskola Komunikasaun Social iha Universidade Católica Timorense (UCT), Cardeal Dom Virgilio do Carmo da Silva kongratula Reitor UCT tanba hari’i no kompleta instrumentu hotu ba prátika Komunikasaun Sosial

“Parabéns ba Magnífiku Reitor ho nia estrutura tomak ne’ebe serbisu makas ohin bele hakat tan pasu ida no marka istoria ida iha universidade ida ne’e hodi hari’i no kompleta instrumentu hotu ba prátika komunikasaun sosial ninian”. Tenik Kardeal Dom Virgílio do Carmo da Silva iha Kampus UCT Balide, 07/09/2023

Kardeal Timor Leste ne’e konsidera, Komunikasaun Social importante tebes hodi treina atu ba futuru komunikador uza meus modernu sira ne’e hotu diak ba públiku, tan ne’e universidade ne’e mos hola no kompromete ninia an atu prepara no eduka mos joven sira ne’ebe hala’o sira nia estudu iha eskola refere

“Hahú hanoin atu bele hetan treinamentu diak ida no prepara sira atu sai dunik ema ne’ebe profisional laos deit teoria maibe prátika ne’e importante tebe-tebes, hahú oinsa atu halo filmagem, programasaun komputador no halo transmisaun liu husi radio”. Kadeal subliña

Arche Bispu Metropolitana ne’e hatutan, Serbisu uma kreda hakarak eduka duni Timor oan ne’ebé eskola iha universidade ida ne’e, eduka sira fo sabor katóliku nian oinsa sira bele trasmite valores liu husi area komunikasaun ninian

“Husu ba estudante sira hotu ne’ebe estuda iha komunikasaun sosial ne’e iha responsabilidade atu uza, buat hirak ne’e universidade ninian maibe sira uza hanesan sira nian, tau responsabilidade ba buat hirak ne’e hodi sai sabor katóliku hodi transmite valores”. Nia hatete

Iha fatin hanesan, Magnífiku Reitor (UCT) Joel Casamiro Pinto hatete ohin akontese mos eventu histórika ida iha universidade Katólika tanba halo Inaugurasaun ba Laboratorium Sentru Formasaun Komunikasaun Sosial iha UCT

“Ohin akontese momentu istóriku katak inagurasaun ba laboratoriom sentru formasaun ba sira ne’ebe hakarak hala’o knar iha komunikasaun sosial nian, oinsa atu prepara sira hodi aban bairua sai kameraman diak, sai hakerek notisia ne’ebe diak, fotografer diak, ida ne mak ami oferese ba estudante sira ho ekipamentu ne’ebe adekuada”. Dehan Reitor UCT

Reitor UCT ne’e mos husu estudante sira hodi uza ho kuidadu, Labele estraga tanba buat hirak ne’e karun no investimento boot liu husi ajuda arche Bispu Dioseze halo atu ajuda foinsa’e sira no Jornalista sira.

Sira ne’ebe aban bairua hakarak kontinua formasaun iha post laboral nian, universidade sei prepara kondisaun atu prepara sira nia kapasidade iha momentu ne’e sei halo deit estudante regular

Jornalista : Ermelinda Soares