Austrália Kontinua Apoia Dezenvolvimentu Ekonomia & Seguransa

SAPNewsTL,DILI- Ministru ba Dezenvolvimentu Internasional no Pasifiku, Ministru ba Defeza industria, Pat Conroy hala’o vizita ba Primeiru Ministru Kay Rala Xanana Gusmão.

Objetivu husi vizita ne’e atu hametin liután parseria entre nasaun rua ne’e no apoiu fundus $35 millões ne’ebe mak sei suporta ba polisia kualifikadu liu husi pograma Dezenvolvimentu Polisia Timor-Leste.

Timor-Leste no Austrália iha parseria ne’ebé forte no amizade, husi ligasaun istórika no kulturál ne’ebé kle’an.

Ministru Conroy hasoru malu ho Primeiru-Ministru Xanana Gusmão no Governu Timor-Leste hodi reforsa kompromisu Austrália nian ba dezenvolvimentu ekonómiku no umanu Timor-Leste, seguransa, preparasaun ba dezastre no prioridade mobilidade traballadór nian.

“Durante vizita, Ministru Conroy anúnsia tán fundus hodi suporta servisu polisia ne’ebé kualifikadu no profisionál iha Timor-Leste liu husi Programa Dezenvolvimentu Polísia Timor-Leste (TLPDP). Kompromisu tokon $35 ne’e sei estende parseria polísia ne’ebé susesu entre Polisia Federal Austrália nian no Polísia Nasionál Timor-Leste (PNTL) ba tinan lima tán”Dehan Ministru Pat Conroy ba jornalista sira iha palasio Governu,Segunda-feira(29/01/2024).

Aleinde ne’e, Ministru Conroy mós anúnsia programa foun ida ne’ebe sei apoiu ba traballadór Timor-oan sira ne’ebé partisipa iha Eskema Mobilidade Traballu Pasífiku Austrália (PALM)

“Servisu parseria hamutuk ho Governu Timor-Leste, kompromisu tokon $4 ida-ne’e sei fornese apoiu sosiál no reintegrasaun adisionál hodi maximiza benefisiu sira ne’ebe sei kontinua ba partisipasaun traballadór Timor-oan sira nian iha eskema PALM fornese empregu, oportunidade no rendimentu ba Timor-Leste nia traballadór sira”Nia haktuir

Nia saleinta katak maizumenus traballadór Timor-oan hamutuk ema 4.500 mak servisu hela iha Austrália iha eskema PALM nian, nune’e ne’e sai hanesan kontribuisaun segundu boot liu ba Timor-Leste nia Produtu Doméstiku Bruto nian hafoin mina-rai no gas.

Fundus tokon $1.58 ne’ebe ministru Conroy anunsia hodi ajuda Timor-Leste prepara no responde ba impaktu sedu husi El Niño. Ida-ne’e parte husi pakote apoiu millaun $5 ne’ebé fornese ba Timor-Leste no Pasífiku.

“Austrália nafatin sai nu’udar Timor-Leste nia parseiru dezenvolvimentu no seguransa boot liu- no sei kontribui ba estimativa milhoens $118 iha asisténsia dezenvolvimentu iha tinan 2023-24″Nia hakotu

Jornalista : Marcela Lemos & Marcela da Costa