CONTL Hasoru SEJD-CDTL Aprezenta Prosesu Final Atleta TL Partisipa SG 2023

SAPNewsTL, Dili: Komite Nasional Olimpiku Timor-Leste (CONTL sigla portuges) hasoru Sekretariu Estadu Juventude (SEJD) ho Konfederasaun Desportu Timor-Leste (CDTL sigla portuges) aprezenta prosesu final ba atleta sira partisipa SEA Games (SG) 2023 iha Cambodia realiza iha fulan maiu tinan ne’e.

“Enkontru ohin hamutuk SEJD ho CDTL ami atu relata servisu CONTL kona ba entry by number, name and sports ba partisipasaun atleta sira ba SEA Games 2023 iha Cambodia, ohin aprezenta servisu ikus nian ba CONTL tanba rejistrasaun ba Sea Games taka ona iha loron 11 fulan marsu tinan ne’e, agora ita hein deit governu aloka orsamentu ba partisipasaun”, vise prezidente CONTL Vicente Carvalho ba jornalista sira iha edifísiu SEJD Lecidere, Dili tersa 14/03/2023.

Vise prezidente hatutan, prosesu lubuk ida sei hein governu tanba sei iha mudansa ba numeru atleta no treinador sira husi modalidade taekwondo no karate-Do no kona ba modalidade Esport no soft tenis ne’e nia federasaun internasional mak apoiu laos CONTL ne’ebe sira senti orgullu tanba federasaun internasional sira bele apoiu federasaun nasional rua ne’e partisipa Sea Games tinan ne’e.

Vicente informa, atleta no treinador sira nia naran  sira rejistu ne’e mai husi federasaun sira karik atleta no treinador nia pasaporte mate ka seidauk iha governu sei fasilita la iha tan atleta foun no treinador foun ona tanba rejistu taka ona.

Iha fatin hanesan SEJD Abrão Saldanha hatete, enkontru ohin ne’e sira atu konfirma fali preparasaun ba Sea Games tinan ne’e nian, rona xefi misaun ba tuir enkontru iha Cambodia no kolia orsamentu hira mak governu prepapara ba atleta sira nia partisipasaun.

“Enkontru ohin ne’e hamutuk ho CONTL no CDTL, ita atu konfirma fali preparasaun ba Sea Games tinan ne’e nian, rona xefi misaun ba tuir enkontru iha Cambodia ne’e no kolia orsamentu hira mak ita prepapara ba atleta sira nia partisipasaun”, tenik Abrão 

Abrão akresenta, orsamentu sira sei iha diskusaun tanba atu redus tuir ida-idak nia papel tanba federasaun balun iha problema ba selesaun, dokumentu mate no iha hela protestu ne’ebe sira rezolve sai husi problema sira ne’e para Timor-Leste sai kontijente solidu ho numeru atleta los ona atu nune’e governu prepara osan tuir ida ne’e no orsamentu provizoriu CONTL aprezenta 300,010 USD maibe governu sei halo ezersisiu ba ida ne’e.

Entretantu tinan ne’e governu liu husi SEJD apoiu atleta ho treinador sira husi modalidade taekwondo, atletizmu, boxing, siklizmu, voleibol praia no karate-Do mak partisipa Sea Games 2023 iha Cambodia no atleta Esport no soft tenis ne’e sira nia federasaun internasional mak apoiu sira.

Reportajen: Augusto dos Santos