Dialogu Ho GAM-GAR, PR Horta : Labele Dun GAM No GAR Hanesan Kriminozu

SAPNewsTL (Dili) : Lider husi Grupo Arte Marsial (GAM) no Lider Grupo Arte Ritual (GAR) hala’o Dialogu aberta ho Presidente da Repúblika Jose Manuel Ramos Horta, Iha sorumutu Xefe Estado husu entidades hotu, atu labele dun GAM no GAR hanesan kriminozu, maibe tenki hatene poblema nia hun lolos.

“Ita labele jeneraliza Arte Marsial, buat hotu dehan sira mak halo, ezemplu deit kuandu membru Polisia Nasional Timor Leste (PNTL) ruma mak halo poblema, ita labele hateten PNTL mak halo problema, maibe individu mak halo laos Ema hotu mak halo konflitu. Tenik Pr. Jose Ramos Horta iha Palasio Presidensial Nicolau Lobato Bairo-Pite Segunda feira, 03/10/2022

Tuir PR Horta ba futuru sei kria peace corps Timor Leste hanesan servisu ida atu lori joven sira iha area oioin no mos agrikultura.

“Ba oin ita iha planu atu kria peace corps, hanesan Grupo Amerikanu sira nian, sira mai iha Timor Leste, Ha’u mak lori sira mai, kria grupo hanesan ne’e envolve joven sira hodi hakbesik ba komunidade sira hodi hala’o aktividade hanesan hamoos lixu,  ajuda komunidade halo produsaun ba agrikula, halo barajen kikoan ba natar  no seluk tan”. Xefe Estadu Sublinha

Iha biban hanesan, Sekretariu Geral Persaudaraan Setia Hati Terate (PSHT) Pedro Aparicio agradese ba Xefe Estadu tanba bele organiza dialogu hodi rona opiniaun ne’ebe organizasaun PSHT hasoru.

“Poblema iha Timor Leste kuaze laiha, poblema sosial mak iha mesmu provas hatudu katak konflitu mosu tanba ema fasil lahalimar dehan ida ne’e PSHT, ida ne’e KORKA no ida ne’eba KERA SAKTI, pasadu hotu- hotu hamutuk husik ona ba kotuk, importante mak futuru ne’e hot-hotu hakat ba oin”. Nia dehan

Entertantu,  Presidente Organizasaun IKS, Silvestre Sufa haktuir wainhira mosu poblema iha komunidade nia leet mesmu pesoal ka partikular, maibe sempre temi Arte Marsial no Arte Ritual sira.

Ikatan Kera Sakti (IKS PTL) hahú halo ona formasaun ba membru sira iha teritoriu nasional

“Ami iha formasaun ba espiritualidade Nasiolalismu no Patriotizmu, valores kultural  no jestaun  organizasional inklui lideransa”.( Haktuir Presidente IKS)

Enkuantu, iha dialogu refere lider organizasaun sira mos tau ba kestaun problema dezempregu ne’ebe kontinua aumenta ba beibeik, iha dialogu ne’e hetan partispa husi Sekretariu Estadu Juventude Desportu, Parte Instituisaun Falintil Forsa Defeza de Timor Leste (F-FDTL), Komisariu PNTL, Prezidente KRAM inklui entidades sira seluk

Jornalista : Vinsensius Saldanha

Editor       : Luis Pailofo