Domingos Eleitu Ba Prezidente CTFJTL
Imajem : Prezidente Eleitu, Sentru Treinamentu Futebol Juvenil Timor-Leste (CFTFJTL) Domingos da Costa. Dili, 27/03/2024
SAPNewsTL, Dili: Domingos da Costa eleitu sai Prezidente Sentru Treinamentu Futebol Juvenil Timor-Leste (CTFJTL) ba mandatu tinan haat mai hafoin hetan fiar iha kongresu CTFJTL datoluk ho pakote úniku.
“Uluk ha’u akompaña, hau nia oan sira mai tuir treinamentu futebol iha CTFJTL maibe agora hau simu fali todan boot ida nu’udar prezidente CTFJTL, hau sei hamutuk ho estrutura tomak ho parseiru sira fiar katak ba oin CTFJTL sei bele la’o diak”, prezidente eleitu CTFJTL Domingos da Costa ba jornalista sira iha salaun Xanana Sport Center Bairro Formosa, Dili kuarta (27/03/2024).
Prezidente eleitu hatutan, planu prioridade tuir estatutu nian mak prepara formasaun futebol ba juvenil sira, formasaun ba treinador ho arbitrajen no hare’e ba infrastrutura maibe nia parte sei tur hamutuk ho koordenador sentru treinamentu futebol juvenil iha munisipiu sira hodi hare’e.
Domingos informa tan, daudaun ne’e estabelese ona sentru treinamentu futebol juvenil iha munisipiu hitu, nune’e sira sei ba diskute ho governu liu husi MJDAC hodi realiza iha tinan hira mai durante sira nia mandatu.
Iha fatin hanesan, koordenador sentru treinamentu futebol juvenil munispiu Lautem Bento Savio hatete, nia orgullu partisipa kongresu CTFJTL ba datoluk tanba ba futebol sira sempre suporta nafatin.
“Ha’u orgullu partisipa kongresu CTFJTL ba datoluk tanba ba futebol ami sempre suporta nafatin”, tenik Bento
Bento afirma tan, sentru sira iha munisipiu ne’e fasilidade no infrastruktura mak menus hein katak ba oin bele hadia buat sira ne’e.
Kongresu datoluk CTFJTL ne’e partisipa husi kongresista Nain-21 husi munisipiu 7 maka Dili, Lautem, Bobonaro, Baucau, Ermera, Covalima no Liquisa akompaña husi eis jogador, reprezentante husi JICA ho inan aman jogador juvenil sira no observa husi governu liu husi MJDAC.
Reportajen: Augusto dos Santos
