Edukasaun La Haree Idade, Veteranu Júlio : Se Lapizeira La Kro’at, Nasaun Sei La Uza

SAPNewsTL, Dili : Hafoin Partisipa Ezame Proposta Monografia Iha Departamentu Enjenharia Sivil, Fakuldade Enjenharia Siénsia no Teknolojia, Iha Universidade Nasionál Timor Lorosa’e (UNTL), Veteranu Júlio Soares Lay hateten, Edukasaun la haree ba ema nia idade, se ema ida-idak iha boa vontade atu aprende, aprende hodi hatene no kontribui ba dezenvolvimentu

“Ha’u senti gratidaun no alegria, wainhira ha’u deside mai kontinua estudu iha UNTL, tanba edukasaun la haree ba idade, se ita na’in iha vontade atu aprende, aprende hodi hatene no kontribui ba dezenvolvimentu nasaun nian, tanba nasaun agora presiza ema ne’ebe iha kapasidade intelektual no experiensia, ita nia lapizeira la kroat nasaun sei la uza, maibe se kroat, nasaun sei uza”. Tenik Veteranu ho grau 8-15, atual estudante finalista iha UNTL, Julio Soares Lay ba SAPNews iha Kampus Fakuldade Engenharia UNTL, Hera, 28/08/2023

Estudante Finalista ne’e hatutan, Uluk iha tempu Indonésia hafoin remata nia estudu iha Sekundaria iha tinan 1997, hanoin atu kontinua maibe tanba situasaun nasaun la permite, nune’e deside la kontinua

“Uluk iha tinan 1997, wainhira remata sekundaria, hakarak atu kontinua maibe situasaun la permite tanba momentu ne’eba ha’u involve iha rede klandestina, entaun situasaun ladun diak ona, nune’e ha’u deside la kontinua, maibe iha tinan 2019, ho oportunidade rejime espesial, entaun ha’u hatama ha’u nia dokumentu veteranu nian, ikus mai naran sai, entaun ha’u mai eskola iha UNTL”. Nia dehan

“Antes ne’e, ha’u estudu Departamentu Enjenharia Sivil iha Universidade Oriental Timor Lorosa’e (UNITAL), maibe, tanba ha’u nia naran sai. Ha’u mai eskola fali iha Departamentu Enjenharia Sivil, UNTL”. Nia hatete

Veteranu ne’e husu ba Veteranu sira ne’ebe idade sei naton bele kontinua fali estudu tanba nasaun agora presiza ema nia matenek hodi servi no hadia nasaun nia dezenvolvimentu

“Buat hotu ita bele iha, maibe naran ikus la iha, ita nia nasaun sei la uza ita maske ita bele veteranus, ita bele eroi to’o oinsa maibe ita nia lapizeira la kro’at nasaun la bele uza ita, maluk veteranu sira, eskola ne’e la presiza haree ba ita nia idade,se bele ita eskola fali, ne’e importante”. Nia fundamenta

Estudante Finalista UNTL ne’e sublinha, “Ema uluk lakohi rai ida ne’e ukun an, sira eskola, ohin sira sai boot, tanba uluk sira iha osan, tempu no espasu hodi aprende, ita labele laran moras wainhira ema sai boot no ukun ita, tanba ne’e ita tenki eskola fila fali hodi servi ita nia rai ne’ebe uluk ita luta”.

Julio Lay konta, “Iha tempu indonésia, ita nia inan aman la iha duni kbiit  para suporta ita ba eskola, ita mete iha rede klandestina ne’e susar  tanba ita eskola mos ita nia hanoin ba rai ida ne’e atu ukun-an ne’ebe ita eskola mos la metin,ohin ita iha tempu, ita tenki eskola no aprende para sai rekursu ne’ebe iha kompeténsia (Kunhesimentu, Atetude no Abilidade) hodi dezenvolve ita rain”.nia konta

Veteranu Julio Soares Lay ho idade 47, husi Rai Manatutu, Hala’o nia estudu Sekundária iha Eskola Sekundária Bekora Dili, iha Tinan 1995-1997, hafoin ukun an nia hari’i nia kompanha rua ne’ebe sempre konkore ba projetu sira, tuir mai nia sai Presidente Cámara Comercio Indústria (CCI-TL) Munisipiu Manatatu no hala’o nia Estudu iha Ensinu Superior iha tinan 2019 no agora daudaun hala’o hela peskija hodi prepara ba projetu final iha UNTL

Jornalista : Marcela Mery da Costa