Ema Ne’ebe Hatene Haraik An & Rona Ema, Nia Sei Sai Ema Diak

SAPNewsTL, Lautém: Iha Misa Agradesimentu Solenidade ba Aniversáriu Parokia Nossa Senhora Ranha dos Apóstolos de Luro ba dala VI, Bispu Dioseze Baukau Dom Leandro Maria Alves hatete dala wa’in mosu problema barak tanba ema la hatene haraik an

Bispu Dom Leandro Maria Alves parabeniza sarani Parokia Nossa Senhora Ranha dos Apóstolos de Luro no husu sarani sira labele falta iha misa kada domingu tanba fiar ne’e tenki konkretiza liu husi hahalok sira

“Parabéns ba imi hotu, Sarani Luro ohin selebra padrueira Nossa Senhora Ranha dos Apóstolos nia loron, imi tenki badinas ba misa, fiar ne’e tenki selebra liu husi Misa no rona Maromak Futar Liafuan hodi konkretiza”. Tenik Bispu Dioseze Baukau Dom Leandro Maria Alves, Luro, 22/08/2023

Líder Maksimu Dioseze Baukau ne’e hatutan, dala wain mosu problema barak tanba ema la hatene haraik an, maske ema ne’ebe hatene haraik an no rona ema seluk ne’e sei sai Diak.

“Dala barak mosu problema oioin tanba ema la hatene haraik an no rona ema seluk, ema ne’ebe hatene haraik an no rona ema, nia ne’e sei sai ema diak iha loron aban bainrua”. Nia subliña

Nia akresenta, Naroman boot ida mosu mai, naroman ne’e lori Damen, Domin no Hakmatek ba ema, Naroman ne’e Mak Jesus Kristu

“Naroman boot ida mosu mai, naroman ne’e mak Kristu, Kristu mai lori Domin, Damen no Hakmatek ba komunidade sira, tan ne’e Ita tenki banati tuir nia hodi halo diak no tulun malu”. Nia dehan

Nossa Senhora Ranha dos Apóstolos, Inan Maria ema simples ida maibe Maromak fihir nia tanba nia ema ne’ebe hatene obedese no halo tuir

“Inan Maria nia ema baibain ida, maibe Maromak fihir nia tanba nia ema ne’ebe obedese no halo tuir, tanba ne’e sarani ne’ebe diak nia tenki hatene haraik an no halo tuir Maromak nia haruka”.

“Wainhira Anju ba vizita Maria nia rona no halo tuir tanba nia hatene haraik an, Maria hanorin mai ita atu hatene haraik an, rona Maromak nia liafuan, no halo tuir Maromak nia vontade”. Nia teni

Iha Misa Agradesimentu ne’e hetan partisipasaun maksimu husi Autoriedade Lokal sira, sarani sira no krismadu sira liu rihun iha Igreja Paroquia Luro

Jornalista: Luis Pailofo