Estrada Aat Difikulta Komunidade Aldeia Uat La Asesu Merkadu, Produtu Folin La’ek
Imajem : Intervista kordenadora grupu Dodes, Fernanda M.P. da Conceicão, iha Aldeia Uat, Bobonaro segunda (6/03/2023)
SAPNewsTL, Bobonaro: Komunidade sira iha aldeia Uat iha Suku Ritabou, Postu Adminisrativu Maliana, Munisipiu Bobonaru, preokupa dalan ne’ebe distansia do’ok tebes ho kondisaun aat difikulta tebes sira atu asesu ba merkadu.
“Ami nia aldeia Uat uma kain atus rua resin ho populasaun 1000 resin inklui ho aldeia 11 ne’ebe iha suku Ritabou ho area ne’ebe mak luan tebes maibe iha tempu udan komunidade sira preokupa tebes ho estrada ne’ebe aat tanba susar tebes atu halo viajem ba mai no araska tebes atu lori sira nia produtu lokal ba fa’an iha merkadu hodi halo negosiu, tanba ho kondisaun estrada ne’ebe mak at tebes”, dehan Xefi Aldeia Uat Julio Leco ba jornalista sira liu husi konferensia imprensa iha Aldeia Uat, Bobonaro segunda (6/03/2023)
Xefi aldeia ne’e hatutan, sira konsege halo proposta ona, entrega ona ba governu relevante iha tinan 2017 maibe to’o agora seidauk responde ba iha proposta refere, tanba deit suku ritabou naran mosu iha invazaun indonesia tama iha Timor-Leste (TL) ne’e mak aldeia uat lakon iha momentu ne’e depois Timor ukun aan, maibe to’o agora sira nia bandeira portugal ne’ebe mak iha momentu bandeira suku nian sei rai hela iha sira nia Aldeia ne’e sai hanesan evidensia, karik estadu ladun fiar karik bele hakat to’o mai sita nia fatin hodi hare sita nia evidensia ne’e.
Imajem Xefi Aldeia Uat Julio Leco
Julio informa, iha aldeia ida ne’e mos dalaruma komunidade sira la partisipa iha eleisaun ho razaun, tanba klima ne’ebe mak malirin, udan hela deit no mos dalan diresaun husi maliana mai iha aldeia Uat ne’ebe mak estrada at tebes entaun halo komunidade ne’ebe iha vila susar ba sira atu mai iha aldeia Uat hodi halo votasaun, sira hakarak rekomenda ba iha estadu bele tau matan ba iha aldeia Uat ne’ebe mak luan teb-tebes no mos populasaun ne’ebe mak sura labele liu-liu programa PNDS no sesta bazika,
Iha fatin hanesan kordenadora grupu Dodes, Fernanda M.P. da Conceicão, kondisaun dalan ne’ebe susar tebes, tanba grupu ne’e difisil tebes atu lori sira nia produtu ba iha merkadu, sira tenke konvida malu iha kalan mak sira ba buka fatin hodi fa’an sira nia produtu.
“Kondisaun dalan ne’ebe susar tebes tan ne’e ami nia grupu ne’e difisil tebes atu lori ami nia produtu ba merkadu, ami tenke konvida malu iha kalan mak sira ba buka fatin hodi fa’an ami nia produtu”, tenik Fernanda
Portantu, Fernanda husu ba estadu hodi tau matan netik ba sira nia aldeia ne’e tanba aldeia ne’e bo’ot, maibe ho kondisaun dalan ne’ebe mak la diak no tanba ne’e saida deit mak sira halo iha sira nia fatin, susar tebes ema seluk atu mai sosa, tanba ne’e sira rasik tenke foti ain hakat ba iha merkadu maske do’ok, sira sei lori tama sai iha aldeia sira seluk hodi fa’an maske la sosa inklui sira labele transporta ba villa tanba estrada ladiak.
Reportajen : Antonio Altamiranda