Fulan Outubru, FIFA Sei Haruka Konsultan Mai Hare’e Rai Estadium Dili
SAPNewsTL, Dili: Ministru Juventude Desporto Arte Cultura (MJDAC) Nelyo Isaac Sarmento informa, Fédération Internationale de Football Association (FIFA) sei haruka nia konsultan mai hare’e rai Estadium Munisipal Dili tanba FIFA iha ona komitmentu tau osan montante 3,000,000 USD hadia Estadium Munisipal Dili tuir padraun internasional iha Timor-Leste.
“Iha tempu badak durante fulan outubru nia laran FIFA sei haruka nia konsultan mai hare’e ita nia rai Estadium Munisipal Dili para oinsa hadia Estadium ne’e tuir padraun internasional iha Timor-Leste tanba FIFA iha ona komitmentu tau orsamentu montante millaun tolu (3,000,000 USD) ba upgrade ita nia Estadium Munisipal Dili tuir padraun internasional iha Timor-Leste”, dehan MJDAC Nelyo Isaac Sarmento ba jornalista sira iha salaun Palasaiu Governu Dili kinta (05/10/2023).
Ministru hatutan, governu hakarak atu upgrade tan Estadium Munisipal Dili nu’udar estadium uniku iha Timor-Leste, tan ne’e ita iha ona komprimisiu ho FIFA tanba FIFA hakarak apoiu governu atu hadia tan Estadium Munisipal Dili diak liu tan nune’e FIFA hakarak tau osan maibe governu tenki oferese estatutu rai Estadium ba FFTL.
Nelyo haforsa tan, governu anterior iha tiha ona desizaun halo identifikasaun ba rai Estadium Munisipal Dili, agora oinsa atu entrega ba FFTL atu halo kontinuasaun ba komprimisiu FIFA halo tanba FIFA nia regra mak ne’e sira hakarak apoiu orsamentu ba hadia Estadium Munisipal Dili maibe rai tenki entrega iha FFTL.
Tan ne’e daudaun MJDAC halo hela diskusaun ho FIFA tanba FIFA agora hare’e hela MOU governu atu asina ho FFTL nune’e governu manda ona MOU ba FIFA no FIFA analiza ona sira la iha ona kestaun ruma hein deit governu asina MOU ne’e ho FFTL maibe FFTL daudaun ne’e problema oituan tan ne’e governu sei hein ida ne’e.
Nia salienta, governu mos iha entendimentu ho FIFA katak FIFA tau osan governu mos tau osan signifika katak bainhira FIFA halo kontrusaun ba Estadium Munisipal Dili mak nia orsamentu montante liu orsamentu FIFA tau ne’e governu sei kontribui orsamentu nune’e governu sei hein konsultan husi FIFA mai hare’e rai Estadium Munisipal Dili depois governu tur hamutuk hare’e kustu ba upgrade estadium ne’e.
Reportajen: Augusto dos Santos