Hetan Insultu Iha MedSos, Marino Konsidera Nitizen Barak La Kompriende Liberdade Expresaun
SAPNewsTL, Dili : Relasiona ho mikrolete ne’ebe halo greve iha kapital Dili tanba kauza husi mina folin sa’e, iha ne’ebé Estudante Universidade Nasionàl Timor Lorosa’e (UNTL) Marino de Deus Pinto halo krìtika ba kondutor mikrolete sira no hetan kedas insultu oioin iha media sosial (MedSos).
Hafoin simu atake oioin husi nitizen sira iha média sosial, Estudante Fakuldade Siénsia Sosiais, UNTL Marino de Deus Pinto konsidera nitizen barak insulta tanba sira seidauk kompriende lolos no la intende saida mak liberdade expresaun
“Sira insulta Ha’u, tanba sira la kompriende saida mak liberdade expresaun, ema ida-idak nia hanoin ne’e tau iha Públiku hodi diskute ho expresaun ne’ebe saudável, ko’alia hatene respeita ema seluk nia hanoin, laos mai ho emosional no insulta ema seluk”. Tenik Estudante UNTL Marino de Deus Pinto ba SAP News TL iha Dili, 06/10/2023
Estudante Fakuldade Siénsia Sosiais UNTL ne’e fundamenta, liberdade expresaun ne’e fo direitu ba sidadaun hotu atu fo nia hanoin ho edukativu lalos ho nervus hodi tolok ema seluk iha média sosial, satan ho Identidade falsu iha média sosial, ne’e hatudu katak laiha responsabilidade ba ninia deklarasaun rasik
“Liberdade expresaun ne’e fo direitu ba sidadaun hotu atu ko’alia sai ninia hanoin ho kualidade no edukativa, liberdade lalos libertinagem, liberdade ko’alia Ninia ideia lalos liberdade ko’alia arbiru, hatene halo analize hafoin kritika ho responsabilidade lalos uza ID falsu iha Facebook hodi insulta ema, ne’e katak nia tauk no laiha responsabilidade, normal iha diferensa hanoin, bele pro no konta, maibe la normal wainhira insulta ema seluk tanba ninia ideia diferente, maske nune’e, maibe nu’udar sivitas akdemiku, ha’u la preokupa nein laran moras, ha’u kompriende sira nia kapasidade kritiku ne’e”. Marino hateten
Marino mos husu nitizen sira iha sosial media atu uza ho responsabilidade no iha kreatividade hodi hakerek artigu kritiku sira hodi promove kapasidade hakerek, interpreta no haklean diskusaun sira ne’be saudavel, edukativu no kualidade hodi eduka ita nia sosiedade ho domin, amizade no armonia
Entretantu, Antes ne’e, Estudante Universidade Nasionàl Timor Lorosa’e (UNTL) Marino de Deus Pinto dejafia kondutor mikrolete sira hodi la halai durante fulan ida
“Ohin Mikrolete la halai, halo kolega estudante barak lakon aula no tama tarde, Ha’u sadik (dejafia) kondutor mikrolete sira hodi labele halai durante fulan 1,”
“Nune’e sira mos bele sente aktu ne’e diak ka lae, wainhira iha problema bele hato’o ba guvernu liliu Diresaun Nasionàl Transporte Terrestre (DNTT), lalos deside paradu derepente hodi halo estudante sira sai vítima”. Tenik Estudante UNTL Marino de Deus Pinto ba SAP News iha Kampus Faspol Kaikoli, 04/10/2023
Marino akresenta, folin mina sa’e ne’e bele komunika ho guvernu liu husi DNTT maibé labele deside hodi paradu tanba estudante barak no sidadaun barak laiha transporte privadu hodi uza ba halo movimentasaun
Estudante UNTL ne’e mos husu Guvernu Konstitusional dasia hodi fo autorizasaun ka loke dalan ba transporte públiku hanesan Tum-Tum hodi bele halo mos sira nia sirkulasaun iha Dili laran, bele mos guveru bele sosa bus hodi sirkula iha Dili nune’e bele fasilita komunidade sira ne’ebe presiza halo viajem
Entretantu, Kondutor Mikrolete sira deside hapara Provizóriu tanba kauza husi folin kombustivel Sa’e husi $ 1.18 ba $1.33 centavos
Kondutor sira konsidera folin mina sa’e prejudika sira nia rendimentu tanba loron ida kada mikrolete tenki hatama 25-30 dolar ba na’in mikrolete sira, nune’e sira hakarak estudante sira hotu tantu passajeiru baibain hotu-hotu selu hanesan ho valor $0.25 centavos kada viajem
Enkuantu, tuir observasaun Jornalista SAPNewsTL iha terenu nota katak Mikrolete 01, 02, 03, 04, 06, 05, 07, 08, 09, 010, 011 012 no 013 kontinua halo movimentasaun hanesan baibain maske folin mina sa’e
Jornalista : Ermelinda Soares