Guvernu Kongratula Atleta TL,  SEJD Sei Fo Abonu Ba Atleta Sira

SAPNewsTL, Dili: Governu liu husi Sekretaria Estadu Juventude no Desportu (SEJD) kongratula atleta universitariu sira ne’ebé lori medalla haat osan mutin ida no metan tolu mai Timor Leste hafoin kompete Asian University Games 2022 ne’ebé hala’o iha Ubon Rachathani, Tailándia.

“Ha’u kongratula atleta universitariu ba AUG 2022 ne’ebé  lori  medalla haat osan mutin ida no metan tolu  mai iha ita nia rai mezmu hetan difikuldade antes atu ba kompete iha eventu ne’e maibé konsege hetan  prestasaun di’ak”. Dehan SEJD Abrão Saldanha ba jornalista sira iha edifisiu SEJD, Lecidere Díli, Tersa-Feira, 9/08/2022.

Governante ne’e apresia  ba atleta sira no sei lori relatoriu husi xefi komisaun misaun ba enkontru ho komisaun nasional desportu atu fo abonu bazeia ba atleta sira nia pretasaun iha eventu ne’e.

Iha fatin hanesan Atleta Felisberto de Deus agradese ba governu no sente orgullu kontribui medalla osan mutin ida no metan ida ba Timor Leste maski hasoru difikuldade fiziku.

“Ha’u sente orgullu hetan medalla rua osan mutin ida no metan ida maski ha’u hetan difikuldade  iha ain maibé ha’u esforsu nafatin hodi kompete iha AUG 2022 tanba ha’u tarjetu hodi hetan medalla osan mean maibé tanba difikuldade ain moras ha’u labele konsege manan osan mean maibé ha’u mos  hadia rekor 5000 m iha Sea Games finaliza ho 16 minutu  ne’ebé iha AUG ho 15 minutu no ha’u rekomenda ba governu prepara médiku haree ita nia atleta sira ne’ebé hetan problema fíziku antes ba kompete iha kompetisaun internasional sira”. Tenik Felisberto

Iha sorin seluk Atleta husi modalidade Xadres  José Fernandes informa, nia la konsege hetan medalla maski kompete iha tipu individu no ekipa maibé esforsu ona hodi hatudu jogu di’ak hein katak sei hatudu rezultadu di’ak iha futuru.

“Iha kompetisaun ne’e ha’u la konsege hetan medalla ba Timor Leste maski kompete iha tipu rua individu no ekipa tanba iha ekipa Timor Leste partisipa ho atleta nain tolu kompete ho adversariu nain lima entaun susar atu kompete hetan pontu husi adversáriu sira maibé mos konsege manan atleta nasaun sira seluk Tailandia no Malaysia maibé la konsege hakat to’o faze tuir mai tanba pontu husi ekipa mínimu liu hein katak sei hetan rezultadu di’ak iha futuru”. José Subliña

Enkuantu, atleta ne’ebé hetan medalla mak Felisberto de Deus husi modalidade Atletizmu konkista medalla osan mutin ida no metan ida, atleta Ana da Costa husi modalidade Taekwondo hetan medalla osan metan ida no Joel Sávio Valente no Tito Miguel Morais Gusmão husi modalidade Voleibol Praia kontribui medalla metan ida.

Jornalista : Augusto dos Santos

Editor : Ekipa Editorial