Manan Medalla 4 Iha AUG, Atleta TL Tékniku Di’ak, Lakon Iha Fíziku
SAPNewsTL: Hafoin Atleta Universitariu Timor-Leste hetan medalla haat iha Asian University Games (AUG) 2022 iha Tailandia, treinador modalidade voleibol praia Feliciano da Costa Soares hateten presiza hadia mak atleta sira nia pasing haksoit, baku bola no blok bola, inklui presiza hadia sira nia alimentasaun.
“Ha’u satisfas ho atleta husi modalidade Voleibol Praia konkista medalla osan metan ida tanba atleta nain rua hetan medalla ne’e foin ba dahuluk tuir eventu AUG ho rezultadu di’ak, ita kontinua fo korajen ba atleta sira nafatin para ba futuru di’ak liu tan, nu’udár treinador presiza hadia mak atleta sira nia pasing haksoit baku bola no blok bola no presiza alimentasaun no durante ita treinu husi fulan marsu to’o training camp iha fulan Juñu tinan ne’e”. Dehan treinador modalidade voleibol praia Feliciano da Costa Soares ba jornalista sira iha edifisiu SEJD Lecidere, Díli, Tersa-Feira, 9/08/2022
Treinador modalidade taekwondo Mateus Soares Iha AUG hatete atleta hetan medalla maibé presiza tan hodi hadia iha parte fíziku
“Atleta nain ida mak hetan medalla osan metan ida maski lori atleta nain tolu, ba oin presiza esforsu di’ak liu tan, treinu iha fíziku nian tanba ita nia atleta hatudu jogu ho tékniku di’ak maibé lakon fíziku, ne’ebé ba tinan oin halo preparasaun ba eventu Internasional atleta sira bele halo preparasaun iha rai liur hanesan tinan tolu kotuk liu ba atleta hatudu rezultadu di’ak karik iha rai laran governu sei gasta osan de’it tanba eventu mínimu tinan ida dala ida”. Tenik Mateus
Treinadora modalidade Atletizmu Cesaltina da Silva hateten atleta hetan problema fíziku maibé esforsu konsege hetan medalla ba Timor Leste iha AUG
“Atleta Felisberto de Deus durante ne’e iha problema fiziku (aleija) bainhira nia fila husi partisipasaun Sea Games 2022 iha Vietnam maibé nia esforsu treinu nafatin hodi konsege hetan medalla osan mutin iha kategoria 5000 m no konkista osan metan ida iha 10000 m ne’ebé nia konsege mos hadia rekor iha 5000 m ho minutu 15, ne’ebé iha Sea Games nia halo minitu 15 no nia aleija ne’e antes iha Timor Leste nia halo ona terapia maibé seidauk rekupera ho di’ak maibé nia esforsu treinu nafatin hodi partisipa AUG ho rezultadu di’ak no hau sei fo treinu nafatin hodi hetan rezultadu di’ak liu tan”. Cesaltina informa
Jornalista: Augusto dos Santos
Editor: Ekipa Editorial