Reuniaun Konsellu Administrasaun FDCH Aprova Orsamentu 2023 Ba Area Haat
SAPNewsTL,Dili : Reuniaun Konsellu Administração Fundo Desenvolvimento Capital Humano (FDCH) ba dala XXII, Ministru Longinhos dos Santos hateten reuniaun ne’e aprova orsamentu 2023 hamutuk 17,7 milhões molok ba Konsellu Ministru no Parlamentu Nasional, enkuantu ezekusaun orsamentu 2022 iha Ministeriu Ensinu Superior Siensia no Kultura atinje ona 58%
“Tuir Natureza Fundu Dezenvolvimentu Kapital Humana ida ne’ebé mak estabelese iha dekretu lei nu.13/2020 ba FCDH nian, kuandu orsamentu FDCH nia atu lori ona ba prosesu Konsellu Ministru, Parlamentu Nasional ka Komisaun Organizador orsamentu politika nian, presija hetan aprovasaun husi Konsellu Administrasaun ne’e rasik”. Dehan Ministeiru Ensinu Superior Siénsia no Kultura Longinhos dos Santos ba Jornalista sira, iha Salaun JL. Villa, Tersa-Feira, 09/08/2022.
Governante ne’e hatutan, orsamentu 2023 nian por volta 17,7 milhões ne’e atu lori ba Parlametu Nasional presiza aprova husi Konsellu Ministru
“Orsamentu 2023 nian ne’e pur volta ke 17,7 milhões, kuandu atu lori ba Parlamentu Nasional presija aprovasaun husi konsellu ministru, tantu membru husi Konsellu Administrasaun, ne’e kompostu husi Ministru Justisa, Ministru Petroleu i Minerais, Ministru Finansas, Sekretariadu Estadu SEFOPE nian inklui Secretaria Estadu Ensinu Superior hanesan Presidenti ba Konsellu Administrasaun”. Ministeru ne’e informa.
Entretantu Ministru ne’e akresenta, programa prioridade ba fundus kapital humanu nian iha hat (4), mak hanesan formasaun profisional, formasaun tékniku, bolsa estudu no tipu formasaun seluk-seluk.
“Ohin Konsellu Administrasaun aprova hotu iha programa haat ne’e ho orsamentu 17,7 milhões, agora lori ona inset ba sistema i depois lori ona ba Parlamentu Nasional, orsamentu 2022 iha ezekusaun ne’ebé di’ak no tama ona iha 58%, iha terseiru trimestre ou iha semestral iha kategoria ne’ebé di’ak no ita analiza to’o iha Dezembru bele atinji to’o 98%, iha programa salariu vensimentu, bens i serbisu, kapital menor no kapital dezenvolvimentu”. Nia salienta
Iha fatin hanesan Sekretariadu Estadu Formasaun Profissional no Empregu Alarico do Rosario hateten atu redus dezempregu tenke tau orsamentu ba formasaun sira para bele forma ema no prepara ema iha rai laran nomos ba serbisu iha rai liur.
“Haree liliu ba area formasaun no mos dezempregu, oinsa ita atu reduz dezempregu ita tenke tau orsamentu ba formasaun sira atu forma ema, oinsa prepara ema iha rai laran no mos serbisu iha rai liur maibé orsamentu ne’e la hanesan tinan-tinan tanba orsamentu ne’e tun ba beibeik, ita hakarak hadia joven sira nia kapasidade ba futuru ita tenke investe orsamentu ba iha área formasaun”. Tenik Alarico
Enkuantu Sekretariu Estadu ne’e informa, orsamentu agora tun ba 874 mil, labele halo buat ida tanba iha sentru formasaun akreditadu sira no mos iha programa estajiu ba joven sira
“Ohin tun ba 874 mil, ida ne’e ita la bele halo buat ida, tanba ami iha sentru formasaun akreditadu hamutuk ruanulu resin hitu (27) no mos iha programa ida estajiu nasional atu haruka joven sira ba estajiu iha liña Ministeriu sira no setor privadu sira, oinsa hadia sira nia kapasidade no mos prepara sira nia an iha merkadu rai laran no mos rai liur tuir skill ne’ebé mak sira hetan”. Katak Nia
Nia aumenta, Fundu FDCH ne’e atu apoiu ba formasaun sira ne’ebé mak sentru sira hetan akreditadu atu oinsa apoiu sira.
“Parseiru sira la bele fo fali apoiu ba osan ne’ebé mak programa estadu nian, parseiru sira so apoiu de’it liliu ba fundu FCDH ne’e haree liu atu apoiu ba formasaun sira ne’ebé mak sentru formasaun sira hetan akreditadu, oinsa para reforsa no apoiu tanba ne’e mak orsamentu tau iha ne’e atu hodi responde ida ne’e”. nia teni
Enkuantu, orsamentu uluk iha 1 milhão 27 mil agora tun tia ba 800 mill, uluk 1 milhão ne’e hodi responde ba programa lian korea ne’ebé fo apoiu ba treinamentu hodi serbisu iha Korea, ohin tun fali ba 800 ne’e atu responde ba tipu tolu hanesan formasaun, estajiu no lian Korea
Jornalista: Marcela Mesquita Lemos
Editor: Ekipa Editorial