Moras Lepra Aas Iha Munisipiu Haat, Pasiente Barak Drop Out Husi Ospital
SAPNewsTL, Dili: Diretor Asosiasaun Ema Afeita Lepra Timor Leste ( AEAL-TL) Joel Costa dos Santos hala’o enkontru ho Prezidente Repúblika José Manuel Ramos Horta iha Palasiu Prezidensial Nicolau Lobato Bairo-Pite, Diretor (AEAL-TL) hateten Prezidente Repúblika sei halo aprosimasaun ho País doador nasaun viziñu sira hodi fo apoiu ba ema ne’ebé afeita moras lepra.
“Iha enkontru ne’e Prezidente Repúblika José Manuel Ramos Horta ko’alia ba ami katak sei halo aprosimasaun ho Pais doador nasaun viziñu hodi fo apoiu ba ema ne’ebé afeita moras lepra iha Timor Leste”. Dehan Diretor (AEAL-TL) ba Jornalista sira iha Palasiu Prezidensial Nicolau Lobato Bairo-Pite, Tersa-Feira, 9/08/2022
Diretor ne’e informa, Asosiasaun seida’uk iha dadus adekuadu, maibé agora dadaun ne’e moras lepra sai a’as liu iha munisípiu Baucau, Oe-Cusse, Dili, no Manatuto.
“Ba tempu ida ne’e ami seida’uk iha dadus adekuadu tanba ami foin estabelese hanesan Asosiasaun foun iha Timor Leste, dadus ne’ebé mak iha, ita hatene katak tinan hira liu ba kotuk ita nia Estadu elimina tiha ona moras lepra, maibé moras lepra ne’e nafatin eziste iha Timor Leste, agora dadaun ne’e sai tarjetu ba númeru ne’ebé a’as liu iha munisípiu mak hanesan Baucau, Oe-Cusse, Dili no Manatuto”. Nia haktuir
Aleinde ida ne’e, Joel salienta maioria pasiente ladún hetan esplikasaun adekuadu oinsa hemu aimoruk nune’e barak mak drop out iha ospital no sentru saude sira.
“Ema ne’ebé afeita moras lepra maioria tenke hemu pakote aimoruk ida naran DT tinan ida maibé tanba ladun hetan esplikasaun ne’ebé adekuadu, maioria pasiente sira barak mak Drop out iha ospital sira no mos sentru Saude tanba ladun hetan esplikasaun klean, ami nia asosiasaun garantia katak sei laiha diskriminasaun ba ema afeita moras lepra, sei laiha stigma no sira nia tratamentu sei adekuadu, tanba ita hatene moras lepra uluk ita nia Avo sira seida’uk iha tratamentu ema sira ne’e hetan estigma, soe, izola,no tau iha fatin seluk. nia tenik.
Enkuantu Asosiasaun Ema Afeita Moras Lepra Timor Leste ( AEAL-TL) hari’i iha tinan 2019 no hetan legalidade iha fulan Abril tinan 2022.
Jornalista : Vinsensius Saldanha Morais de Araujo
Editor : Luis Pailofo