Guvernu Tau 50 Millões Ba BNCTL, Fo Impréstimu Ho Funan Ki’ik
SAPNewsTL(Dili) : Prezidente da Repúblika Jose Manuel Ramos Horta partisipa iha serimonia enseramentu formasaun kona-ba empoderamentu feto iha IADE, Xefe Estadu ne’e hatete formasaun ne’e espesial ba inan feton sira ne’ebe hakarak halo business, para sira bele komprende no hatene liu tan, Kona-ba halo planeamentu, sukat sasan, kontabilidade, merkadu, poupansa hodi sira ba oin.
“Ha’u nia preokupasaun kuandu loke departementu ne’e iha Palasiu Prezidensial bolu dehan, Empoderamentu da mulher, and power, presizamente haree para oinsa bele muda sira no tane sira,maibe laos haree ba feto sira ne’ebe Iha business bo’ot hanesan loja bo’ot sira.” Lia hirak ne’e hato’o husi Presidente da Repúblika Jose Manuel Ramos Horta ba Jornalista sira iha IADE Mandarin Dili, 23/08/2022
Aleinde ida ne’e Xefe Estadu mos hato’o parabens ba formasaun IADE bele ajuda Inan feton sira hodi aprende buat ruma iha sektor business maske ho Kiik derepente sa’e ba bo’ot.
“Tanba ne’e maka Presidente da Repúblika halo programa ida mak, bolu dehan Empoderamentu ba feto sira, atu haree tulun inan feton sira, alin feton sira, abin sira iha Timor, para bele sai hanesan Independente, ekonomikamente, finansiamente,ou bele tulun liu tan familia”.afirma xefe Estado
Tuir PR Horta, iha tempu ruma aktividade ekonomiku barak sei akontese, entaun para inan feton sira, tia sira, bele hetan benefisiu mos hodi partisipa direitamente ho konesimentu.
“Prosesu ne’e tenki kontinua labele loron ruma de’it hanesan dala ida ka rua,Lae, ne’e sempre permanente hodi kontinua, au mesmo tempu Governo tau 50 milhoes iha BNCTL ne’e foin primeira vez presiza halo tulun ita nia sektor privadu, maibe ho funan ne’ebe kman los ho 3%, tanba uluk ne’e bo’ot los 14%, 12%, minimu 8%, mais agora ne’e 3%, Ha’u sempre defende empréstimu ba sektor privadu ho 3%, bele tun 2%”. Dehan Presidente da Repúblika
Entertantu, Prezidente da Repúblika kontente ho desizaun Governu nian ne’ebe mak tau Osan iha BNCTL, oinsa apoiu feto sira iha Timor Leste bele hasa’e kresimentu ekonomiku.
Jornalista : Vinsensius Saldanha Morais De Araujo
Editor : Luis dos Santos