Hahú Mini Kampanha Iha Hatu-Builico, PDC Promete Hadia Estrada, Agrikultura No Turizmu

SAPNewsTL, Ainaru :  Partidu Demokrata Cristão (PDC) hala’o Mini Kampanha dahuluk iha Munisipiu Ainaru Postu Administrativu Hatu-Builico, Iha Diskursu Presidente PDC Francisco de Araujo afirma PDC sei luta hodi hadia ekonomia no desenvolve setor agrikultura, nune’e bele hasa’e produsaun agrikola iha rai laran

“Tinan lima mai ita sei esforsu, oinsa hadia ekonomia povu nian, ita nia povu sira maioria mak moris ho agrikultura, iha produtu lokal ne’ebe mak barak tebes maibe la tau esensial, nune’e PDC iha programa ida atu halo modelizasaun ho makina sira ne’ebe mak kuda rasik, halo toos no natar sei kontinua uza sasan manual hanesan aisuak ho insada no seluk tan, tanba ne’e ida ne’e ita tenki hadia hodi hasa’e produsaun iha rai laran”. Dehan Prezidenti PDC Fransisco de Araujo iha nia diskursu ba militante sira iha Hatu-Builico, 19/04/2023

Lider PDC ne’e mos promete “ Ami sei esforsu hodi desenvolve fatin turistiku sira inklui estrada tanba liu husi fatin turismu sira ne’e mak hatama retornu ba estadu tanba ita hotu haree Postu Hatu-builiku iha fatin turismu hanesan Nossa Senhora Ramelau, fatin históriku no seluk tan, maibe oinsa ema husi lokal nian no turista sira atu mai vizita serake estrada ne’ebe mak la diak no fo risku ba vizitante sira”.nia hatutan

Nia salienta, “Ita mos persija haree ba infraestrutura nian tanba estrada aat tinan barak ona la iha mudansa, eletrisidade nafatin mate lakan, povu kontinua halerik ba bee moos, ita ukun tinan barak ona maibe seidauk halo dezenvolvimentu ne’ebe mak diak ba ita nia povu no ita nia povu sira nafatin terus ba bebeik ho ida ne’e mak PDC tau iha nia programa hodi rezolve problema ne’ebe povu hasoru”. Nia dehan

Iha fatin hanesan, Vise Presidente PDC Domingos da Costa, husu ba kordenador Munisípiu to’o suku aldeia hodi sérvisu makaas lori vitória ba Partido Democrata Criatão nune’e bele Hetan asentu iha parlamentu Nasional

“PDC husu ba militante sira iha Hatu–Builico tenki servisu makaas hodi vota ba PDC atu hetan kadeira iha Parlamentu Nasionál hodi hadia no promove pontesialidade produtu lokal sira iha Hatu-Builico no mos hadia estrada liga husi Maubisse to’o Hatu-Builico, nune’e ita boot sira bele Lori ita bot sira nia produtu sira ba merkadu.” Dehan Vise Prezidente PDC

Vise Prezidente PDC haktuir iha Hatu–Builico riku ho produtu lokal hanesan Repollu, fehuk ropa, koto no seluk tan, maibe produtu hirak ne’e atu asesu ba merkadu ne’e hodi hasa’e kresimentu ekonomia iha postu ne’e

Enkuantu, PDC sei kontinua nia kampanha ho modelu odamatan ba odamatan iha Postu Ainaru Villa, aban loron 20 Abril 2023

Jornalista : Lidia Amaral