Hari’i Eukarístia ! Pe. Victor : Jesus Hatudu Haraik An, Domin & Serví
SAPNewsTL, Dili : Iha selebrasaun Kinta-Feira Santa, Pe. Victor de Jesus hateten, Jesus la mai atu ema servi nia, maibe Jesus Kristu tun mai mundu hodi servi ema hotu.
“Jesus la mai atu ema servi nia, maibe Jesus mai atu servi ema hotu, Jesus fase apóstolu sira ain ne’e hatudu duni ninia haraik an no domin ba ema hotu tanba nia halo buat ne’ebe la baibain ba ema sira”. Tenik Pe. Victor de Jesus ba sarani sira iha Sagradu Korasaun de Jesus Bekora (SAKROJES) DILI, 28/03/2024.
Padre selebrante ne’e konsidera kinta-feira santa hanesan loron ne’ebe importante no memoria eterna, momentu ne’e mak Jesus Kristu hamutuk ho nia dixíplu ka apóstolu sira hari’i eukarístia santa.
“Ohin kinta feira santa, momentu memorial no importante tebes ne’ebe ita selebra hamutuk, ohin mak momentu ne’ebe ita na’in Jesus Kristu hamutuk ho nia dixíplu sira hari’i eukarístia santa”.Nia konta
Victor de Jesus hatutan, Jesus han hamutuk dala ikus nia apóstolu sira, Jesus husu atu liu husi biban ne’e halo ema hotu hodi halo tuir nia no halo hahalok ne’e hodi hanoin kona ba Jesus.
“Jesus han hamutuk dala ikus ho apóstolu sira, Jesus dehan, : Ne’e ha’u nia isin ne’ebe sei saran ba mate tan imi, halo ida ne’e hodi hanoin ha’u, nune’e mos ne’e kalis ha’u ran nian, ran aliansa fou no rohan laek, hemu ida ne’e hodi halo tuir ha’u, katak Jesus hatudu ninia haraik an ba ema atu ema hotu bele halo tuir no hanoin nia tanba nia mak dalan, lialos no moris”. Victor de Jesus hateten.
Nia mos husu ba sarani, atu hakaas an hatudu domin no tulun ba ema seluk ne’ebe presiza tulun no kuran domin husi ema seluk, tanba moris ne’e presiza apoia malu no servi malu nu’udar maun alin.
“Domin ne’e haraik an, domin la laran moras, domin la halo an no domin ne’e servi no fahe katak ema ida-idak presiza hatene fahe buat ruma ho ema seluk, hadomi ema seluk, maibe molok hadomi ema seluk, uluk nana’in tenki hadomi uluk ita nia isin, hafoin hadomi na’i maromak liu sasan hotu-hotu”. Nia husu
Enkuantu, selebrasaun ne’e hetan partisipasaun husi sarani parokia SAKROJES Bekora, no hetan mos seguransa husi parte Polísia Nasionál Timor-Leste (PNTL).
Jornalista : Ekipa Kobertura
