Kobertura Iha ELPAR 2023, TLPU Halo Formasaun Ba Jornalista
Imajen: Prezidente Konsellu Imprensa Otelio Ote Hamutuk Ho Formador No Formandu Sira Iha Salaun Tower Fatuhada, Dili kinta (30/03/2023).
SAPNewsTL,Dili-Timor Leste Press Union (TLPU) fasilita formasaun kona-ba jornalista transparénsia no eleisaun inkluziva ba jornalista ne’ebé hamahan ba organizasaun ne’e atu nune’e bele iha kuñesimentu ba kobertura iha Eleisaun Parlametar ELPAR 2023.
Imajen: Sekretariu Jerál TLPU Zezito da Silva
“Ami servisu hamutuk ho parseiru estratéjiku hanesan UNDP realiza hela programa formasaun ida ne’e ba jornalista timoroan sira hodi prepara sira nia an, atu halo kobertura diak ba kampanha eleitóral no eleisaun lejislativa ne’ebé sei akontese iha loron 21 fulan maiu tinan 2023”, dehan sekretariu jerál Zezito da Silva ba jornalista sira iha salaun Tower Fatuhada Dili, 30/03/2023.
Sekretariu Jerál hatutan, formasaun ne’e sei hariku jornalista sira nia konesimentu atu hala’o servisu ho profesionál iha eleisaun jerál, no atividade jurnalístika loron-loron.
Nia informa, Estrutura TLPU agradese ba ajensia UNDP ho Embaixada Japaun iha Timor-Leste ne’ebé apoiu formasaun durante loron tolu hahú iha loron 28 to’o 30 fulan marsu 2023.
“Ha’u lori membru TLPU tomak, no Jornalista sira, hakarak agradese ba UNDP ho Embaixada Japaun iha Timor Leste, ami hein katak apoiu ne’e labele to’o iha ne’e deit, maibé ba oin nafatin servisu hamutuk ho TLPU atu bele implementa programa sira nesesáriu ba assuntu mídia nian”, tenik Zezito
Entretantu jornalista sira partisipa iha formasaun ne’e hamutuk nain-30 mai husi media RTTL, STL, GMN TV, RKDTL, Esperansa, Dili Post, Dili Weekly, Desportu XYZ, Naunil, Business Timor no SAPNewsTL, jornalista sira ne’e hetan materia husi formador mai husi media Lusa, TATOLI, konsellu imprensa, UNTL no CNE.
Reportajen: Joao Marito