Ponta Leste Manan Kontra Porto Taibesse 3-0

SAPNewsTL, Dili: AS Ponta Leste konkista vitoria Kontra Porto Taibesse FC ho skore 3-0 iha jornada daneen divizaun dahuluk Liga Timorense epoka 2023.

Jogu AS Ponta Leste kontra Porto Taibesse FC hala’o iha Estadium Munisipal Dili sesta (31/03/2023).

Iha jogu parte dahuluk ekipa rua hala’o kedas jogu iha situasaun udan nia laran ne’ebe kampu nakonu ho bee no tahu halo ekipa rua tenki joga hetan bola soe kedas ba oin nune’e tama ba minutu 3 jogador Expedito da Conceicão husi AS Ponta Leste marka golu halo redi adversariu nakdoko hatuur kedas skore ba 1-0.

Skore refere halo ekipa rua halo presaun no atake ba malu ne’ebe tama ba minutu 7 jogador Expedito da Conceicão marka tan golu hodi muda skore ba 2-0, sofre ona golu rua Porto Taibesse FC tenta atu marka golu ba AS Ponta Leste maibe la konsege tan ne’e to’o minutu 45 jogu parte dahuluk remata jogador sira husi ekipa rua la aumenta tan golu maski hetan oportunidade ameansa baliza kada ekipa nian ne’ebe skore nafatin 2-0.

Kontinua tama ba jogu parte daruak ekipa rua mantein jogu tuir ida-idak nia estratejia maibe jogador sira husi Porto Taibesse FC halo presaun makaas ba AS Ponta Leste atu marka golu maibe la konsege no AS Ponta Leste halo kontra atake maski kampu nakonu ho bee no tahu ne’ebe tama ba minutu 84 jogador Olagar Xavier husi AS Ponta Leste marka tan golu muda fali skore ba 3-0 ne’ebe skore 3-0 mantein to’o jogu minutu 90 remata.

Depois jogu remata treinador Porto Taibesse FC Miro Bento dehan, nia fo parabens ba ekipa adversariu no sei hadia diak liu tan ba jogu tuir mai.

“Hau fo parabens ba AS Ponta Leste konsege manan ami tanba futebol mak nune’e tan ne’e hau enkoraja hau nia jogador sira labele lakon motivasaun tanba derrota ida ne’e ami sei hadia diak liu tan ba jogu tuir mai”, tenik Miro

Miro hatutan, sira hakarak husu ba parte hotu liu komisaun organizador hotu tenki tau matan ba kampu ida ne’e tanba adeptu mai atu hare’e futebol laos mai hare’e sirkus tanba ohin udan bee nakonu kampu sira husu atu hapara jogu depois bee maran mak joga fila fali maibe jogu lao nafatin

Iha sorin seluk treinador AS Ponta Leste Edi Fernandes hatete, hau agradese ba jogador sira tanba halo jogu tuir orientasaun ekipa tekniku nian tan ne’e sira hetan vitoria hadia pozisaun iha tabela klasifikasaun.

“Hau hakarak agradese ba hau nia jogador sira nia esforsu mezmu klima udan boot difikulta ba ita nia kampu nakonu ho bee no tahu ne’ebe ohin hau fo orientasaun ba jogador sira hetan bola soe ba oin tan ne’e hau nia jogador sira marka golu rua tuirtuir malu iha parte jogu dahuluk tanba jogu tuir estratejia ekipa tekniku nian no tama ba jogu parte daruak mos jogador sira nafatin tuir orientasaun ekipa tekniku nian nune’e jogu remata konsege marka golu tolu nune’e ami hetan vitoria iha jogu ne’e hadia ami nia pozisaun provizoriu okupa fatin daruak iha tabela klasifikasaun divizaun dahuluk Liga Timorense epoka 2023”, Edi hateten

Entretantu iha jogu ne’e AS Ponta Leste halo substituisaun ba jogador nain rua no Porto Taibesse FC troka jogador nain lima, jogador Olagar Xavier husi AS Ponta Leste hetan kartaun kinur, vitoria ne’e lori AS Ponta Leste provizoriu okupa pozisaun daruak iha tabela klasifikasaun divizaun dahuluk Liga Timorense epoka 2023 ho pontu 10 husi manan dala tolu, impata ida no lakon rua no derrota ne’e lori Porto Taibesse FC provizoriu okupa pozisaun dahaat ho pontu 7 husi manan dala rua, impata ida no lakon rua.

 

Reportajen: Augusto dos Santos