Konsidera ElPar 2023 Pajina Ikus, Lere : La Hari’i Futuru Sabraut, Lider Tenki Tau An Didiak

SAPNewsTL, Dili : Relasiona ho kampanha no eleisaun Parlamentar ne’ebe mai daudaun, Lider Troika Partidu Frente Revolucinario Timor Leste Independente (FRETILIN) Jeneral Lere Anan Timur haktuir povu maduru no matenek ona hili se mak atu ba ukun, ba ukun atu servi estadu laos buka osan

“Eleisaun ida ne’e laos foin mai ita atu halo, agora ba nonu governu kontitusional,  parlamentu mos nu’udar sestu tanba ne’e laos buat foun ba ita nia povu. povu ne’e maduru, sira ne matenek ona atu hili ninia destinu tanba iha ninia destinu ne’e iha ninia lideransa nia liman, katak partudu politiku ne’e hotu-hotu esforsu halo ninia esforsu tomak atu oinsa mak bele ukun, ukun atu servi estadu laos ukun atu buka osan ou buka kadeira deit”. Tenik Lider Troika Partidu FRETILIN Jeneral Lere Anan Timur, iha Farol Dili, 12/04/2023

Jeneral ne’e konsidera eleisaun Periodu ida ne’e nu’udar pajina dahikus ba jerasaun tuan sira hodi prepara kondisaun molok husik hela ukun ba jerasaun foun sira

“Eleisaun ida ne’e liuliu ba lider tuan sira ne’ebe bolu komanda luta ida ne’e mak ultima pajina ba sira, Agora ne’e tinan politiku, lakleur ita tama ona ba kampanha no eleisoens tanba ne’e Sira agora tenki koloka sira nia an didiak atu tinan lima ne’e nia laran tenki iha susesu ba ukun nonu governu konstitusional, se la iha susesu mak futuru Timor-Leste sei sabraut hela no aban bainrua jerasaun foinsa’e sira intelektuais sira ne’ebe agora matenek sira ne’e bele mantein iha sira nia destinu”. nia dehan

Lider Nasional ne’e hatutan, Nia parte sei tun halo kampanha ba Partidu FRETILIN, nia afirma sei la trata lider ida tanba demokrasia la signifika espasu ba ema atu trata malu iha kampanha

“Eleisaun ida ne’e tenki la’o hakmatek, Respeita Malu, politika ho etika, la bele uza liafuan demokrasia hodi trata malu iha palku kampanha,
Demokrasia ne’e liberdade atu expressa ninia hanoin no hakarak maibe la signifika aproveita ida nee hodi trata malu durante kampana nia laran, Ha’u la hatene trata malu maibe hau hatene respeita ema, Ha’u apela ba ita nia lider sira, ema komesa trata ita, la respeita ita tanba ita ita mak la respeita malu ona. Se ita respeita malu,ita hamutuk nafatin hanoin ema apresia, ema tauk atu tau ibun ba ita, mas tanba ita loke dalan antaun sira aproveita”. nia husu

Nia Fundamenta, durante kampanha nia laran oportunidade ba lider sira hodi ko’alia kona ba programa ko’alia kona ba papel, misaun no vizaun partidu ida-idak ninian, liliu garante eleisaun ne’ebe justu no hetan rezultadu diak ba destinu povu nian

“Ha’u fila mai hamutuk ho Partidu FRETILIN laos ha’u mai hodi afilia maibe ha’u defende FRETILIN durante tinan 24, ha’u fakar ha’u nia ran, sakrifika ha’u nia familia nia vida i soldadu barbarak mate ba FRETILIN tamba ida ne’e mk hau fila, Hau sei halo esforsu hotu ba palku ho politiku lolos ko’alia programa, prinsipiu misaun,vizaun FRETELIN ninian ba povu maubere”. nia sublinha

Nia akresenta, iha kampanha Partidu hotu-hotu sei ko’alia kona-ba sira nia programa katak hakarak povu tenki moris diak hetan asesu dignu ba saude, estrada, eskola,eletrisidade bee moos no saneamentu no seluk tan, Programa ba povu nia bem estar hanesan maibe ida ne’ebe atu ezekuta la hanesan tanba dala ruma hanoin uluk ninia an depois mak povu ida ne’ebe mak foti nia iha fatin aas ne’eba

Segundu Jerasaun Komite Sentral FRETILIN ne’e mos husu ba povu Timor Leste hodi partisipa, kontribui no exerse direitu ho lolos hodi vota iha dia 21 de maiu ho konsiensia tuir partidu ne’ebe fo konfiansa ona hodi ukun no lidera nasaun durante tinan liama(5) nia laran

Jornalista : Conzita Mota