Kopa FFTL: São Jose La Konsidera Lica Lica Lemorai Ekipa Zigante

SAPNewsTL, Dili – Klube São Jose la konsidera Lica Lica Lemorai FC nu’udar ekipa zigante maibe sira rekonese nia adversariu rejistadu iha Liga Timorense, tan ne’e sira motiva jogador sira lakoi lakon kontra Lica Lica Lemorai iha Kopa FFTL 2024 iha loron aban.

Jogu São Jose FC kontra Lica Lica Lemorai FC sei hala’o iha Estadium Munisipal Díli iha loron aban, sexta-feira, 17 fulan maiu 2024.

“Ami nia adversariu Lica Lica Lemorai FC nu’udar klube rejistadu iha divizaun daruak Liga Timorense mai ho jogador esperensia tebes ne’ebe tasak ona maibe nu’udar klube sira mos motiva sira nia jogador mai ho vontade lakoi lakon kontra adversariu tanba sira mai para kompete laos partisipa”, dehan treinador São Jose Antonio Timotio ba jornalista sira liu husi konferensia imprensa iha Estadium Munisipal Díli kinta, (16/05/2024).

Treinador hatutan, sira husi São Jose FC nia preparasaun limitadu tuir kondisaun klube nian maibe sira prontu kontra Lica Lica Lemorai FC iha jogu aban iha Kopa FFTL 2024.

Klube hotu-hotu kompete kopa garante manan hotu maibe rezultadu jogador sira mai sei determina rezultadu tuir saida mak durante sira treinu iha klube ho treinador sira.

Antonio salienta tan, sira nia klube laos rejistadu iha Liga Timorense, nune’e sira sei lori jogador lokal deit maibe jogador sira barak liu mai husi jogador sira ne’ebe antes ne’e esperensia tiha ona iha divizaun dahuluk no daruak Liga Timorense nian hamutuk ho jogador sira seidauk joga iha liga.

Iha fatin hanesan, Diretor Tékniku Lica Lica Lemorai FC Manuel Da Costa hatete, sira preparadu kontra São Jose FC iha loron loron aban.

“Ami husi Lica Lica Lemorai FC preparadu tuir kondisaun klube nian ba jogu aban kontra São Jose FC ne’e nu’udar jogu dahuluk ba ami pool D iha Kopa FFTL 2024, ami optimista manan São Jose FC maibe rezultadu minutu 90 mak sei determina iha kampu tanba ekipa adversariu mos halo preparasaun ba sira nia jogador sira mai kompete kopa ne’e” diretor hateten

Diretor informa tan, sira sei kompete Kopa FFTL 2024 ho jogador lokal deit barak liu mai husi forsa defeza Timor-Leste antes joga klube sira seluk iha divisaun dahuluk no daruak Liga Timorense hamutuk ho jogador sira seluk antes ne’e reforsa klube iha liga no la iha jogador estranjeiru.

Nia esplika tan, klube hotu-hotu sai ameansadu ba malu tanba iha ambisaun hakarak manan hotu iha jogu liu husi ida-idak nia programa treinu, tan ne’e atu hetan rezultadu pozitivu minutu 90 mak sei determina iha kampu.

Reportajen: Augusto dos Santos