La Kumpri Promesa ! Arnaldo Husu Governu Hadia Estrada Luro
SAPNewsTL, Lautem: Komunidade Postu Administrativu Luro sempre halerik ba estrada, Arnaldo Soares hateten estrada Luro a’at guvernante sira promete iha palku kampaña maibe to’o agora seidauk hadia hodi difikulta ba movimentu transporte iha tempu udan.
Tuir komunidade Postu Luro Arnaldo Soares katak nia preokupa ho estrada Luro rasik no Luro liga ba Lautem ne’ebe sempre kotu bainhira iha tempu udan entaun difikulta movimentu transporte publiku sira.
“Ha’u preokupa ho kondisaun estrada Luro nian ne’ebe sempre kotu iha tempu udan halo impedimentu ba movimentu transporte husi Luro ne’ebe transporta komunidade nia produtu ba fa’an iha merkadu inklui difikulta movimentu transporte husi Luro ba Lospalos no Dili, nune’e husu ba guvernu atu haree kondisaun estrada Luro ne’ebe tinan naruk ona seidauk hadia”. Dehan Arnaldo Soares iha Luro, 4/05/2024
Arnaldo haktuir governante sira ne’ebe tur iha governu no parlamentu sempre promete iha tempu kampaña maibe infelizmente seidauk rezolve.
“Komunidade Postu Luro hotu-hotu, Autoridade lokal sira hatene katak estrada Luro ne’e a’at, Na’i ulun sira ne’ebe agora dadauk tur iha governu no Parlamentu mai halo kampaña eleitoral iha Postu Luro ne’e sira mak halai kareta tuir estrada ne’e duni, sira haree sira koalia sira promesa maibe nunka tau matan nune’e estrada ne’e sempre a’at hela de’it”. Nia
Entretantu, Administrador Postu Administrativu Luro hato’o ona pedidu ba Obras Publikas Munisípiu Lautem enkamina ona ba Nasional maibe seidauk iha resposta.
“Ita halo ona pedidu ba Ministerio Obras Publikas Munisípiu Lautem no pedidu ne’e lori ona ba nasional maibe ita seidauk hatene bainhira mak bele mai, ita tenta nafatin hein katak semana ida ne’e bele to’o ona hodi halo normalizasaun ba estrada”. APA Luro informa
Enkuantu, iha terenu jornalista SAPNewsTL observa estrada sira ne’e kotu tanba impaktu husi udan ne’ebe hamosu be’e la tuir nia dalan tanba valeta hotu la di’ak nune’e provoka rai monu hodi taka estrada inklui be’e sa’e to’o estrada.
Jornalista: Leonel Alves & Denilia Soares