Lansa Kampaña Nasionál Kuda Kafé, PR Horta Husu Agrikultor Sira Servisu Makaas

SAPNewsTL, Ermera : Prezidente Repúblika (PR) José Ramos-Horta lansa Sexta-feira Semana kotuk, Kampaña Nasionál Kuda Kafé iha Suku Fatubesi Postu Administrativu Hatulia B, Munisípiu Ermera. Hafoin entrega enxada ba agrikultór sira, Xefe Estadu kuda simbolikamente kafé iha rai mamuk iha Fatubesi no husu ba agrikultór sira atu servisu maka’as liu tan.

“Ita tenke trata kafé didi’ak, kafé na’in sira kuda kafé, konforme halo tuir tékniku sira hatete, tau matan ne’e, la’os de’it tinan-tinan ba ku’u kafé, la’e, ita atu ku’u hudi ruma tenke kuda hudi, rega ai-funan ne’ebé de’it, kafe mos hanesan, hamoos didi’ak, sanak sira tuan ne’e, ita tesi, kuda bebeik para tinan 10 ka 20 mai, imi nia bei-oan sira mak iha kafé ne’e, se la’e kafé lakon” tenik Xefe Estadu iha lansamentu kampaña kuda kafé. Hatulia B, 23 Dezembru 2022

Entretantu, Tema bá programa ne’e mak HADOMI KAFÉ, KAFÉ ITA NIA KULTURA, tanba ne’e Xefe Estadu apela nafatin ba to’os na’in no tékniku sira, atu halo tratamentu di’ak ba kafé, prevene atake peste, hodi haforsa produsaun no tulun dezenvolvimentu ekonómiku.

Iha Fatin hanesan, Sekretariu Estadu Peska, Elidio de Araújo ne’ebe reprezenta Ministru Agrikultura no Peskas no Prezidente Auroridade Munisipiu Ermera, Eugébio Salsinha, elojia inisiativa husi Prezidente Repúblika no parseiru sira ne’ebé aposta ba melloria produsaun kafé iha Ermera.

“Ministériu Agrikultura sente kontente no orgullu tebes ho esforsu husi Prezidente Repúblika, tanba pasu ida reabilitasaun, ohin loron ida-ne’e, inisia hatama tan kafé (Kampaña Nasionál Kuda Kafé) para atu aumenta, normalmente tenke kuidadu” tenik Sekretáriu Estadu Peskas.

“Ha’u agradese mós ita-nia empreza lokal sira hanesan MCBH ho Timor Global, ne’ebe halo ona fatin prosesamentu ba kafé no kualidade ba mundu interionasional,” apresia Prezidente Auroridade Munisipiu Ermera kona-ba produsaun no prosesamentu kafé iha Ermera.

Enkuantu, Kampaña Nasionál Kuda Kafé, partisipa husi Embaixador Brunei Darusalam, Nova Zelándia, membru Parlamentu Nasionál balun, Kargu Xefia sira iha Ministériu Agrikultura no Peskas, Auroridade Lokál no to’os na’in sira.

Jornalista : Vinsensius Saldanha