LFTL Aprezenta Ona Relatóriu Finansial Ba Instituisaun Sira
SAPNewsTL,Dili: Orgaun Liga Futebol Timor Leste (LFTL) aprezenta ona relatoriu orsamentu patrosinador ba Sekretariu Estadu Juventude Desportu (SEJD) hamutuk ho Federasaun Futebol Timor Leste (FFTL) no klube sira iha kongresu daruak LFTL iha Maubara Room Timor Plaza iha 2019.
“Liga Futebol Timor Leste hamrik iha 2015 ne’ebé orsamentu husi patrosinador sira ne’ebé apoiu liga futebol husi 2015 to’o 2019 ami prepara ona iha livru ida ho naran relatóriu epoka 2015-2019 ne’ebé mak ami aprezenta ona no mos fahe livru ne’e ba orgaun komponente sira hanesan FFTL, SEJD no klube sira iha momentu kongresu orgaun LFTL ba daruak iha 2019 ne’ebé realiza iha Maubara Room Timor Plaza”. Dehan Direktor Finansa LFTL Caetano Cárceres Correia liu husi press konferensia ba jornalista sira iha edifisiu LFTL-Dili Kinta-Feira, 25/08/2022.
Direktor ne’e akresenta, relatóriu ba orsamentu ne’e sira halo tranparansia ona iha livru no fahe ba klube sira, FFTL no SEJD maibé to’o agora seida’uk iha parte ruma kestiona.
“Seida’uk hetan parte ruma kestiona dehan seida’uk iha media ne’ebé mai iha edifisiu LFTL maski odamatan LFTL nakloke ba se de’it, ne’ebé patrosinador ba liga epoka 2015-2016 sira hetan patrosinador husi SEJD apoiu orsamentu 40 % ho montante 490.000 USD, Esperensa Timor Oan (ETO) apoiu 35.000 USD, Bintan Heineken Beer 39,977 USD, kompania Tinolina fo 7,000 USD no Perisos apoiu mos ho 5,000 USD”. Tenik Direktor
Nia hatutan, iha liga epoka 2016-2017 no 2017-2018 patrosinador nafatin fo apoiu mak SEJD, Kompania Bintan Heineken Beer, Timor Plaza no Perisos.
“Ita nia liga iha epoka 2016-2017 ita nia patrosinador sira nafatin husi SEJD apoiu orsamentu 60% ho montante 210,000 USD, ETO fo 41,317 USD no Bintan Heineken Beer apoiu 50.000 USD no iha liga 2017-2018 Patrosinador husi SEJD apoiu nafatin orsamentu ho 391, 725. 75 USD, Bintan Heineken Beer 40,000 USD no Timor Plaza 3.000 USD, liga no mos iha ita nia liga epoka 2018-2019 SEJD apoiu nafatin orsamentu ho total 271, 560 USD, Bintan Heineken Beer 10,000 USD, kompania Perisos fo 5.000 no FFTL apoiu 150.000 USD”. Caetano klarifika
Direktor ne’e salienta, orsamentu patrosinador sira apoiu ne’e, sira utiliza ba operasional no administrasaun liga epoka 2015-2019 ne’ebé seida’uk iha kompania mesak ba liga.
“Orsamentu ne’ebé ita nia patrosinador sira apoiu husi 2015-2019 ne’e orgaun LFTL aloka ba operasional liga futebol Timor Leste nian hanesan administrasasaun orgaun LFTL hodi halo banner tau iha kampu, subsidiu ba klube sira, premiu jogu no premiu ba kampiaun, ne’ebé liga futebol to’o agora ita seida’uk iha patrosinador mesak atu fo finanseiru ba iha liga futebol ne’ebé sai patrosinador ba liga futebol iha tipu golden, silver no broze sponsor maibé to’o agora ita la iha kompania ida atu foti ne’ebé iha liga futebol epoka 2021 sponsor husi FFTL no SEJD rasik la iha tan patrosinador seluk no relatóriu liga futebol Timor Leste epoka 2021 nia relatóriu ami submete ona ba SEJD no FFTL”. Nia afirma
Entretantu adjuntu sekretariu jeral FFTL Frederico Martins hatete, sira seida’uk simu informasaun klaru ba orsamentu ne’ebé patrosinador sira apoiu husi 2015 to’o 2021
“Ita nia federasaun involve liga futebol Timor Leste iha 2019 bainhira muda liga amadora mai liga futebol Timor Leste, tinan ida ne’e SEJD reduz ona orsamentu ba liga futebol Timor Leste ne’ebé iha mudansa maibé husi inisiu ita nia liga amadora hetan patrosinador sira mak fo apoiu ona maibé FFTL seida’uk simu informasaun klaru ba orsamentu husi patrosinador sira husi 2015 to’o 2021”. Frederico subliña
Jornalista: Augusto dos Santos
Editor: Ekipa Editorial