Lidér Antigu IMPETTU & PJLA ! Assanami Hetan Kondekorasaun Husi Xefe Estadu
SAPNewsTL, Dili : Durante Komemorasaun ba loron Proklamasaun Independénsia ba dala 48⁰, Premiadu Nobel da Paz, Xefe Estadu José Ramos Horta, kondekora Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, ho medalla grau kolar Orden Timor-Leste.
Orden Timor-Leste rekoñese, maka hanesan, servisu exesionál sira ne’ebé presta ona husi profisionál destakadu sira hodi defende Timor-Leste no Timoroan sira.
Medalla ne’e ho prestíjiu no dignidade, atu fó rekoñesimentu Timor-Leste nian ba sira ne’ebé nasionál no estranjeiru sira, ne’ebé iha sira-nia atividade profisionál, sosiál, ka iha aktu espontánea eroízmu ka altruizmu, fó ona sira-nia kontribuisaun ne’ebé boot ba benefísiu Timor-Leste, timoroan sira ka Umanidade nian.
Dekretu Prezidente Repúblika nian, ne’ebé dekreta kondekorasaun ne’ebé mensiona ona, destaka katak servisu ne’ebé hala’o ona husi ita-nia Titulár sira Órgaun Soberania Estadu nian, no membrus Parlamentu Nasionál no Governu, iha ámbitu sira-nia funsaun no relasoins entre Estadus ho objetivu atu promove amizade entre povu sira maka krusiál, ne’ebé kontribui mós ba dame, estabilidade nasionál no dezenvolvimentu iha Timor-Leste nian
Timor-Leste konsege hakat liu dezafiu oin-oin no alkansa ona susesu balun, iha área determinada sira dezenvolvimentu nian, ne’e tanba atividade lubun ida ne’ebé realiza ona husi ita-nia Titulár sira Órgaun Soberania Estadu nian, no membrus Parlamentu Nasionál no Governu durante sira-nia mandatu.
Eng. Mariano Assanami Sabino Lopes, moris iha Postu Administrativu Luro Munisipiu Lautém, iha loron 12 fulan-Abríl tinan 1971 nu’udar oan mane dahuluk familia nian iha Luro.
Mariano Assanami Sabino Lopes agora daudaun ne’e asume hela kargu nu’udar Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária (VPM-MKAS-MDRHK) iha Governu Konstitusionál IX.
Iha tinan 1991, durante nia estudu iha Universidade Brawijaya Malang iha Indonézia, Assanami Sabino partisipa ativa iha Resistência Nacional dos Estudantes Timorenses (RENETIL), iha ne’ebé Assanami Sabino mos okupa funsaun oin-oin, hanesan pozisaun Vise-Sekretáriu-Jerál RENETIL. Nia envolve iha atividade barak iha organizasaun ida-ne’e hodi okupa embaixada sira iha Jakarta iha tinan 1995.
Mariano Assanami Sabino Lopes mos halo manifestasaun barak iha tinan 1998. Assanami Sabino mos lidera assosiasaun estudantes Indonéziu-Timor (Ikatan Mahasiswa dan Pelajar Timor-Timur (IMPETTU) to’o fila mai rai Timor Leste.
Hafoin fila mai Timor-Leste iha tinan 1999, nia hola parte iha Komisaun Planeamentu no Koordenasaun Kampaña Konsellu Nasionál Rezisténsia Timoroan (CNRT), ne’ebé responsavel ba Departamentu mobilizasaun hodi envolve partisipasaun timoroan hotu-hotu iha Referendu hodi luta ba autodeterminasaun Timor Leste nian.
Iha tinan 1999, Assanami Sabino mak sai hanesan fundadór no ko-koordenadór ida ba Prezidium Juventude Loriko Aswa’in (PJLA). Iha tinan 2001, Assanami Sabino sai membru fundadór Partidu Demokrátiku (PD) hodi asume responsabilidade hanesan Sekretariu Jeral PD. Assanami Sabino mos hetan mandatu nu’udar deputadu iha Parlamentu Nasionál iha Lejislatura I iha asembleia konstituente (2002-2007) no sai deputadu iha Kinta Legislatura (2018-2023).
Mariano Assanami Sabino Lopes mós sai membru Governu Konstitusionál IV, V, VII, Portantu daudaun ne’e Assanami Sabino asume kargu nu’udar Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária iha governasaun ida ne’e.
Mariano Assanami Sabino Lopes mos sai Sekretáriu Jeral Partidu Demokrátiku durante periodu tolu (2001-2006, 2007-2011 no 2012-2017). Hafoin Saudozu Fernando Lasama de Araujo fila hikas ba Aman Maromak nia kadunan santu iha loron 02 Junhu 2015 hodi husik hela Kargu Prezidente Partidu Demokrátiku, iha tinan 2017 liu husi Kongressu Nasional Militantes no Kuadrus PD depozita konfiansa ba Mariano Assanami Sabino Lopes lidera Partidu Demokratiku desde tinan 2017 to’o ohin loron.
Iha okaziaun refere Prezidente Republika José Ramos Horta mos kondekora Prezidente Republika Guine-Bissau, Ministru Prezidénsia Konsellu Ministru, Dr. Hermenegildo Augusto Cabral Pereira, kondekora mós Membru Parlamentu Nasionál Aniceto Longuinhos Guterres Lopes, Arão Noe de Jesus da Costa Amaral no David Dias Ximenes ho Orden Grau Kolar Timor-Leste Nian.
Jornalista : Ermelinda Soares