Liga Timornse 2023, Porto Taibesse Manan Academica Ho Skore 2-1

SAPNewsTL, Dili: Porto Taibesse FC manan Academica FC ho skore 2-1 iha jornada daruak divizaun dahuluk Liga Timorense epoka 2023 ne’ebe ho vitoria ne’e Porto Taibesse FC konsege hetan pontu tolu iha jogu refere.

Jogu Porto Taibesse FC kontra Academica FC hala’o iha Estadium Munisipal Dili domingu (5/03/203).

Iha jogu parte dahuluk bainhira kick off jogador sira husi Academica FC halo kedas presaun no konsege marka golu lais iha segundu 20 husi jogador estranjeiru Nortey Kojo halo redi adversariu nakdoko ne’ebe hatuur kedas skore 1-0.

Golu lais ne’ebe akontese ne’e halo ekipa rua sae kedas ritmu jogu tuir estratejia treinador idak-idak nian hodi halo presaun ho kontra atake ba malu ne’ebe iha minutu 21 jogador husi Porto Taibesse FC Lazio Piedade marka golu hodi halo redi Academica FC nakdoko hodi muda kedas skore 1-1.

Skore 1-1, halo ekipa rua mantein jogu presaun no kontra atake ba malu hodi fo amensa lubuk ida ba guarda redi atu marka golu maibe  la iha jogador ida husi klube rua marka tan golu to’o hodi muda skore ne’ebe to’o minutu 45 remata skore impata 1-1.

Kontinua ba jogu parte daruak ekipa rua muda estratejia jogu halo nafatin presaun no kontra atake ba malu makaas tebes ne’ebe iha minutu 54  Porto Taibesse FC aumenta tan golu ida husi jogador estranjeiru Yohanes Jehaman ne’ebe muda skore ba 2-1.

Skore 2-1 halo Academica FC halo presaun  makaas ba adversariu hodi ameansa tebes guarda redi tan hakarak aumenta golu  maibe jogador adversariu la fo oportunidade no jogador Porto Taibesse FC mos halo kontra atake makaas ba Academica FC maibe la konsege aumenta tan golu to’o minutu 90 remata skore nafatin 2-1, rezultadu ne’er halo Porto Taibesse FC konsege hetan pontu tolu iha jogu refere ne’e sai hanesan vitoria dahuluk ba Porto Taibesse FC iha Liga Timorense epoka 2023.

Depois jogu remata treinador Academica FC Luisinho dos Santos Saco hatete, sira derrota tanba jogador sira kole semana ida ne’e joga dala rua tuir tuir malu no ladun satisfaz ho arbitrajen sira nia desizaun.

“Ami derrota tanba jogu iha parte dahuluk bainhira hau nia jogador sira marka ne’e sira nia komunikasaun lao diak maibe bainhira jogu komesa manas ona hau nia jogador sira lakon ona komunikasaun tanba hau nia jogador sira kole semana ida ne’e ami hala’o jogu dala tuir tuirmalu tan no hau ladun satisfaz ho desizaun arbitu nian ne’ebe dirije jogu ne’ebe fo kartaun ba hau nia jogador sira maski jogador adversariu halo diving hodi rezulta akumulasaun kartaun ba hau nia jogador labele joga iha jogu tuir mai”, tenik Luisinho

Treinador hatutan, Jogu tuir mai sira sei kontra ekipa boot ida AD SLB Laulara ne’ebe ohin sira derrota ona, sira sei esforsu para hatudu jogu diak kontra adversariu tanba sira sei halo preparasaun durante semana ida nia laran.

Iha fatin hanesan treinador Porto Taibesse FC Miro Bento dehan, “Ha’u agradese tebes fo obrigadu ba hau nia jogador sira hotu sira halo jogu diak tuir hau nia hakarak mezmu iha faila oituan iha jogu laran ne’ebe parabens ba hau nia jogador sira tanba amo hetan pontu tolu”, nia haktuir

Jogu tuir mai sira otimista nafatin atu hetan pontu tolu para hadia nafatin pozisaun iha tabela klasifikasaun Liga Timorense epoka ne’e tanba agora seidauk hatene se mak atu sai kampiaun no degradasaun tanba daudaun ne’er klube sira hotu iha oportunidade hanesan

Entretantu ho vitoria ne’e halo Porto Taibesse FC hetan pontu tolu provizoriumente hakat ba pozisaun dalimak ho pontu tolu husi jogu dala rua lakon ida ho manan ida no derrota ne’e halo Academica FC okupa pozisaun daruak ho pontu haat husi jogu dala tolu manan ida, impata ida no lakon ida.

Reportajen: Augusto dos Santos