Manan Assalam 2-1, Oportunidade Ba Karketu Kampiaun Liga Timornse 2023

SAPNewsTL, Dili: Karketu Dili FC iha oportunidade atu sai kampiaun Liga Timorense Epoka 2023 hafoin manan Assalam FC ho skore 2-1 iha jornada dalimak divizaun dahuluk liga tinan ne’e.

Jogu Karketu Dili FC kontra Assalam FC hala’o iha Estadium Munisipal Dili domingu (16/04/2023).

Iha jogu parte dahuluk bainhira kick off jogador sira husi ekipa rua muda bola ain ba ain hodi hala’o jogu tuir estratejia ida-idak nian nune’e ekipa rua halo presaun no atake ba malu hodi hetan oportunidade ameansa baliza kada ekipa nian ne’ebe tama ba minutu 25 jogador Martinho Belo husi Assalam FC marka golu halo redi Karketu Dili FC nakdoko hatuur kedas skore ba 1-0.

Skore refere halo ekipa rua hasa’e ritmu jogu nian nune’e jogador sira husi ekipa rua nafatin kria oportunidade hodi marka tan golu ne’ebe tama ba minutu 37 Karketu Dili FC konsege responde golu adversariu nian husi jogador Paulo Gally Freitas halo redi adversariu Assalam FC nakdoko muda fali skore 1-1 nune’e skore refere mantein to’o jogu minutu 45 jogu parte dahuluk remata.

Kontinua tama ba jogu parte daruak nian jogador sira husi ekipa rua nafatin hatudu jogu diak nune’e sira nafatin halo presaun no atake makaas ba malu tenta marka tan golu ne’ebe tama ba minutu 63 jogador Paulo Gally Freitas husi Karketu Dili FC marka tan golu halo redi Assalam FC nakdoko ba dalarua muda skore ba 2-1.

Karketu Dili FC tenki manan para iha oportunidade ba kampiaun no Assalam FC tenki hetan vitoria para hadok an husi zona degradasaun nune’e jogador sira husi ekipa rua nia jogu manas liu tan tenta hetan oportunidade ameansa baliza kada ekipa nian maibe jogador sira husi ekipa rua la konsege aumenta tan golu skore 2-1 mantein to’o jogu minutu 90 remata nune’e vitoria ne’e lori Karketu Dili FC iha oportunidade atu sai kampiaun ba divizaun dahuluk Liga Timornse Epoka 2023.

 

Depois jogu remata asistente treinador Antonio Timotio hatete, sira nia jogador esforsu makaas nune’e hetan pontu tolu buka dalan ba kampiaun. 

“Jogu ohin ami nia jogador sira esforsu makaas tebes tanba ami buka dalan ba kampionatu ne’ebe ami hetan pontu tolu nune’e ami mos sei iha jogu rua laoa fasil ba ami maibe hakat ho neneik ba bebeik”, tenik Antonio 

Antonio hatutan, jogu tuir mai sira hasoru ekipa AD SLB Laulara halo preparasaun baibain maibe hadia tatika no estratejia tanba sira ho ekipa AD SLB Laulara iha oportunidade boot sai kampiaun. 

Iha sorin seluk treinador Assalam FC Gaspar Soares dehan, sira hakarak manan para ba iha zona seguru maibe la konsege maibe treinador senti kontente jogador sira hatudu jogu diak.

“Ami sei iha zona ne’ebe la seguru nune’e ohin jogu ami ho intensaun manan ka impata para atu iha zona seguru maibe la konsege hetan ida ne’e no hau senti kontente ohin hau nia jogador sira hatudu jogu diak maski jogador balun iha problema fiziku no akumulasaun kartaun”, Gaspar hateten

Gaspar akresenta tan, jogu tuir mai sira sei hadia sira nia estratejia diak liu tan kontra Atletico Ultramar/Coração FC.

Entretantu iha jogu ekipa nian ne’e Karketu Dili FC halo substituisaun ba jogador nain tolu no Assalam FC troka jogador nain rua, jogador Orcelio Novelito ho Pedro Vicente husi Karketu Dili FC hetan kartaun kinur, jogador Jose Pereira ho Joviano Braz husi Assalam FC hetan mos kartaun kinur, vitoria ne’e lori Karketu Dili FC provizoriamente hakat ba pozisaun datoluk iha Tabela Klasifikasaun Liga Timorense epoka 2023 ho pontu 12 husi jogu manan dala haat ho lakon rua ne’ebe iha oportunidade atu sai kampiaun no derrota ne’e halo Assalam FC provizoriumente okupa pozisaun daneen iha tabela klasifikasaun ho pontu 8 husi jogu manan dala rua, impata rua no lakon tolu.

Reportajen: Augusto dos Santos