Manan Leopa FC Skore 1-0, FC Cafe Sai Kampiaun iha Kopa AFM-E 2022

(SAPNewsTL) DILI : Klube Cafe Ermera sai kampiaun iha Kopa Asosiasaun Futebol Munisipiu Ermera (AFM-E)  2022 hafoin manan ekipa Leopa FC iha jogu final ho skore 1-0.

Tuir Observasaun Jornalista Sap News TL iha terenu, ekipa  rua mai jogador intimu ne’ebe ho ambisaun hetan vitória hodi sai kampiaun iha Kope AFM-E 2022 ne’ebe bainhira jogu kick off FC Cafe Ermera no Leopa FC halo kedas presaun ba malu maibe Cafe Ermera FC  konsege domina bola  pasa bola ba ain hodi halo presaun ba ekipa adversáriu maibe ekipa adversariu nia lina defeza la fo oportunidade ba Cafe FC marka golu ne’ebe to’o parte jogu dahuluk durante minutu 45 remata la iha ekipa marka golu.

Tama ba jogu parte daruak  ekipa rua halo mudansa  ba jogu hodi nafatin halo presaun ba malu liu husi kontra atake ne’ebe tama ba minitu 58 jogador Café Ermera FC  Emíliando Soares númeru kamizola 10  konsege marka golu ida hodi halo redi ekipa Leopa FC nakdoko tanba baliza la konsege asegura hodi halo FC  Cafe Ermera  lidera ho skore 1-0.

Rezultadu ne’e halo ekipa rua hasa’e ritmu jogu hodi halo presaun ba malu ne’ebe ekipa Leopa FC halo atake makaas liu tan atu halo empata jogu maibe la konsege marka golu ida no ekipa FC Café  Ermera mos nafatin halo kontra atake hodi aumenta golu maibe la konsege marka golu ida ne’ebe to’o minutu 90 remata skore nafatin 1-0 ne’ebe rezulta Café Ermera FC hetan vitória kontra Leopa FC ne’ebe ho vitória ne’e FC Café Ermera sai kampiaun iha Kopa AFM-E 2022.

Enkuantu jogu remata treinador FC Café Adriano Casimiro Quintão hatete, sira kontente manan kontra Leopa FC iha jogu final AFM-E 2022 no sira agradese ba adeptu sira ne’ebe halo jogador sira iha vontade hatudu jogu furak  no komisaun organizadora bele realiza jogu ne’e

“Ami kontente manan kontra Leopa FC ho skore 1-0 iha jogu  final hodi sai kampiaun Kopa AFM-E 2022  ne’ebe ami agradese ba adeptu sira husi FC Cafe Ermera no Leopa FC nian tanba ho sira nia desportivu halo jogador iha vontade para joga hodi hatudu jogu ne’ebe mak furak, ha’u agradese ba komisaun organizador Kopa AFM-E 2022 ne’ebe bele realiza jogu ne’e”, tenik treinador

Adriano hatutan, ohin ekipa rua hatudu jogu hanesan deit maibe jogu ida tenki manan no ida lakon ne’ebe ohin sira manan maibe sira jogador lina klaran nian halo sala no jogador avansadu ladun efetivu hodi marka golu ne’ebe sira sei esforsu hadia sala sira ne’e hotuhodi preapara ba jogu tuir mai

Iha fatin hanesan treinador Leopa FC Edito R. dos Santos informa, durante ne’e sira prepara hodi kontra FC Cafe Ermera maibe sira tenki derrota no simu ida ne’e tanba ekipa adversariu jogu diak liu

“Durante ne’e ami prepara hodi mai kontra FC Cafe Ermera iha final ida ne’e maibe ami derrota ami tenki simu rezultadu ida ne’e tanba ekipa adversariu hatudu jogu diak duni ne’ebe ami respeita ekipa adversáriu ne’ebe ohin jogu ami falla iha lina klaran ne’ebe ba jogu tuir mai ami sei hadia ida ne’e”, tenik Edito

Edito aumenta tan, sira hakarak rekomenda aban bainrua Kompetisaun ne’e iha fali arbitrajen bainhira tama iha jogu final hanesan ne’e karik bele konvida arbitrajen husi nasional mai dirije jogu, maske nune’e, maibe nia senti Asosiasaun Futebol Munisipiu Ermera nia preparasaun diak tebes tanba sira hetan fiar hodi simu konvite husi asosiasaun ne’e

Jornalista : Ausgusto dos Santos