Mohamed Konsidera Ramos Horta Lider Úniku & Ezemplu Iha Mundu

SAPNewsTL, Abu Dhabi : Durante Xefe Estadu José Ramos Horta kontinua diskute kona-ba pás no rekonsilisaun iha mundu, Sekretáriu Jerál Muslim Council of Elders (MCE), Mohamed Abdelsalam konsidera José Ramos Horta nu’udar líder úniku no ezemplu iha mundu

 

Sekretáriu Jerál Muslim Council of Elders (MCE), Mohamed Abdelsalam saran lia hirak ne’e iha sede Fraternidade Humana, sidade Abu Dhabi, 14-10-2023.

Prezidente Repúblika, José Ramos-Horta nia relasaun ho MCE desde 2021 bainhira hahú involve nu’udár juri internasionál ba Prémiu Zayed Human Fraternity Award no kontinua hamutuk hodi dezenvolve no divulga dokumentu Fraternidade Umana.

Xefe Estadu afirma liutan, ‘’Sira rasik hakarak loke eskritóriu Fraternidade Umana iha Timor Leste, no eskritóriu ne’e bele utiliza de’it iha semana ida kada tinan bainhira presiza atu halo reuniaun, hafoin ida ne’e Timor Leste utiliza ba nesesidade sira ne’ebé relasaun ho Fraternidade Umana,’’ explika Prezidente Horta.

Tuir Xefe Estadu, sede Fraternidade Umana hari’i iha Timor Leste sei kontribui liu tan atu halo Timor-Leste sai fatin hakiak dame no toleránsia atu sai ezemplu iha mundu no komunidade MCE.

Mohammed Abdelsalam, sente onradu ho vizita supreza ne’e tanbá konsidera katak atuál Xefe Estadu Timor-Leste, nu’udár ikón no ezemplu iha mundu hotu tambá promove pás no promove valór fraternidade umana, koezaun sosiál no toleránsia.

‘’Ramos-Horta nu’udar ezemplu ida, hodi hatudu valór sira husi konsisténsia, respeitu no komprensaun ba malu. No ita haree iha Timor-Leste ezemplu reál ida kona-ba oinsá nasaun ki’ik ida-ne’e iha rekursu ne’ebé haraik-an, iha dalan atu hetan dame, konsisténsia no fraternidade umanu ho ninia viziñu hotu no rejiaun tomak,’’ Katak Mohamed Abdelsalam.

Líder MCE ne’e, expressa mós nia admirasaun ba relasaun Timor-Leste ho Indonézia, iha ne’ebé, bainhira enkontru ho Prezidente Repúblika Indonézia, Jokowi, sempre ko’alia kona-ba relasaun bilaterál iha area oin-oin ho forte entre nasaun rua ne’e.

‘’Há’u iha mensajen atu hato’o ba povu Timor-Leste katak imi tenke sente orgullu tanba maski nasaun simples no foin dezenvolve, maibé imi iha líder bo’ot ida, Prezidente úniku iha mundu ne’ebé nu’udár premiadu Nobel ba Pás”.

 

“José Ramos Horta mós membru xave ida no membru importante sira iha família Premiu Internasional Zayed nian ba Fraternidade Umanu, ho fiar ida-ne’e, imi sei kontinua moris-di’ak no iha futuru ne’ebé naroman liu ba imi-nia rai, tanba imi-nia espíritu laran-metin no ezisténsia nian ne’ebé imi iha’’, afirma Mohamed Abdelsalam.

 

Enkuantu, Presidente Repúblika José Ramos Horta ho delegasaun agora daudaun sei iha Abu Dhabi hodi partisipa iha reuniaun nível altu sira no sei fila hikas mai Timor-Leste iha loron 22 Fulan Outubru tinan ne’e

 

Jornalista : Domingos Ferreira