Notísia La’os Krime, AJTL Husu Utiliza Lei Komunikasaun Labele Uza Lei Jeral
Reprezentante Asosiasaun Jornalista Timor-Leste (AJTL), Scos Veira iha edifisiu PCIC Kolmera, 23/12.
SAP News TL, DILI: Polisia Sientifika Investigasaun Kriminal (PCIC sigla portuges) halo notifikasaun ba jornalista sira tenki utiliza lei espesifiku komunikasaun ba liberdade espresaun nian labele uza lei jeral tanba media sira nia Notísia ba publiku laos krime.
“Ita nia lei komunikasaun sosial iha tiha ona entaun ita labele uza lei jeral tanba ema bolu kona-ba deroga, entaun lei jeral ne’e ita uza bainhira lei espesifiku seidauk iha maibe dadaun ne’e lei komunikasaun sosial iha ona tanba ne’e bainhira jornalista halo sala iha artigu direitu reposta no halo ratifikasaun”, dehan Reprezentante Asosiasaun Jornalista Timor-Leste (AJTL), Scos Veira iha edifisiu PCIC Kolmera, 23/12.
Nia hatutan, PCIC Notifika Jornalista Domingos Gomes ho xefi redasaun Jorginho dos Santos husi media Independente TL ne’e hanesan aktu ka prosesu ida ne’ebe atu bele hatauk jornalista sira maibe jornalista sira labele tauk tanba kazu ne’ebe dadaun ne’e mosu ita nia Konstituisaun garante ita nia direitu ho total, entaun AJTL nafatin ho jornalista sira hodi defende liberdade imprensa to’o ne’ebe de’it.
Scos dehan, AJTL konsidera katak buat ne’ebe autoridade seguransa sira halo liu-husi Polisia Cientifika Investigasaun Criminal (PCIC), ne’e atentadu entaun AJTL nafatin akomapaña tanba haree kazu ne’ebe PCIC halo inkeritu ba jornalista husi kazu anterior ne’ebe lakumpri lei espesifiku.
Nia informa, kazu ne’e husi Ministeriu Interior no PNTL nian, sé Ministeriu Interior no PNTL sente katak Jornalista Domingos Gomes ho xefi redasaun Jorginho dos Santos husi media Independente TL nia notísia ne’e hakanek tenke halo karta diretamente ba redasaun maibe la’os liu fali PNTL ka sé deit maibe tenke ba redasaun atu nune’e redasaun bele halo diretu resposta no ratifikasaun tuir lei komunikasaun sosial.
Journalista: John Marito & Ermelinda Soares