Orsamentu 440,000 USD Ba Realizasaun Liga Timorense, Nelio : Tau Prioridade Finanseiru Ba Klube Sira
Imajen Eis SEJD Nelio Isac
(SAP News TL) DILI- Eis Sekretariu Jeral FFTL Nelio Izaac husu Federasaun Futebol Timor-Leste (FFTL) ho orgaun Liga futebol Timor-Leste (LFTL) realiza Liga Timorense epoka 2022-2023 ho orsamentu 440,000 USD ne’ebe apoiu mai husi Sekretariu Estadu Juventude Desportu (SEJD) ho FFTL tenki fo prioridade suportasaun finanseiru ba klube sira selae susar atu hala’o liga karik la responde klube sira nia ezizensia
“Liga Timorense 2022-2023 ne’e finansia husi SEJD orsamentu montante 240,000 USD no FFTL ho montante 200,000 USD ne’e LFTL ho FFTL tenki fo prioridade suportasaun finanseiru ba ita nia klube sira para sira iha komitmentu ita realiza liga selae susar atu realiza karik la responde klube sira nia kestaun, ita sei la hetan jogador diak no kualidade jogu iha ita nia liga futebol ne’e”, eis sekretariu jeral FFTL ba jornalista sira iha edifisiu Partidu CNRT Bairro Formosa, Dili kuarta (30/11).
Eis sekretariu jeral ne’e akresenta, orsamentu ne’ebe agora iha FFTL, LFTL no SEJD tuur hamutuk oinsa para hala’o liga ne’e ho diak inklui orsamentu apoiu ba klube sira no orsamentu ne’ebe SEJD ho FFTL tau ona bele hala’o Liga Timorense epoka ne’e ho full kompetisaun, maibe LFTL ho FFTL iha komitmentu tenki fo prioridade apoiu ba klube sira depois koalia mos ho klube sira kona ba premiu sira ho situasaun orsamentu ne’ebe iha ona no ikus haree orsamentu oituan finansia ba operasaun liga nian karik LFTL mos tenki hatene poupa osan ba premiu adisional ne’ebe presiza.
Nelio afirma, se FFTL ho LFTL iha governasaun diak rezolve uluk suportasaun finanseiru ba klube sira maibe tenki kriteria husi AFC no FIFA nian
“Se FFTL ho LFTL iha governasaun diak rezolve uluk mak suportasaun finanseiru ba ita nia klube sira maibe kriteria husi Asian Football Confederation (AFC) ho Federation International de Football Association (FIFA) ita nia klube sira mos halo relatoriu orsamentu suportasaun ba FFTL tanba bainhira iha dalan klaran mak FFTL iha problema responsabilidade ba relatoriu orsamentu suportasaun no FFTL sei hetan risku hodi hetan kulpa orsamentu husi FIFA sira tenki tetu buat sira ne’e”, tenik Nelio Izaac
Eis SEJD hatutan, FFTL, LFTL ho SEJD tenki tuur hamutuk hodi halo diskusaun ba situasaun sira ne’e para liga ne’e lao iha mudansa para hetan jogador diak no kualidade jogu ne’ebe ho situasaun sira ne’e sira labele ansi hala’o liga epoka 2022-2023 ne’e no tuir lolos Liga Timorense epoka ne’e seidauk la’o orgaun liga rezolve tiha lai estrutura tanba sira nia prezidente rezigna an ona ne’ebe seidauk iha ema ida substitui maski sira iha vise prezidente sira mak ba fali interinu.
Reportajen: Augusto dos Santos