PDC Promete Kria Industria Kafe Iha Aileu, Dezenvolve Turizmu Komunitaria No Hadia Ekonomia

SAPNewsTL, Aileu : Prezidente Partido Democrata Cristao (PDC) realiza mini kampanha iha Postu Administrativu Aileu Vila, Suku Seloi hodi aprezenta programa PDC ba militante sira no konsensializa povu hodi vota ba programa partidu, nune’e bele hadia ekonomia komunidade nian durante tinan lima mai

“Munisipiu Ainaru no Aileu, iha produsaun ne’ebe mak nakonu mos ho kafe, ita hotu hatene katak emprezariu husi liur mak mai hodi determina folin kafe ba ita nia komunidade sira nia produtu, tanba ne’e mak ita nia hakarak kafe na’in sira mak fo presu ba emprezariu sira, para emprezariu sira labele hatun fali presu kafe tuir sira nia hakarak, ita mak tenki fo presu ba sira”. Tenik Presidente PDC Francisco de Araujo ba Jornalista sira iha Suku Seloi, Aileu Vila, 25/04/2023

Francisco hatutan PDC hakarak atu fo konfiansa ba emprezariu sira hodi loke induztria no fo presu ne’ebe serve duni ba kafe nain sira katak kafe maran ida tenki ho presu dolar 5 no kafe matak ho presu dolar 1, PDC sei dekreta lei ida hodi regulariza prosesu faan kafe

“PDC fo konfiansa ba ita nia emprezariu lokal sira hodi loke industria kafe no fo mos presu ne’ebe mak serve duni ba ita nia kafe nain sira, ita haree hanesan kafe tugu buaya deit, ita tenki simu husi rai-liur, ita hare buat ne’ebe mak iha ita nia rai iha hela maibe ita sei investe husi rai liur, ita la tau perioridade ba ita nia komunidade sira iha rai laran nia produsaun sira, PDC hakarak dekreta lei ida hodi regulariza presu folin kafe no faan kafe, kafe maran ida ho dlar 5 no matak ho dolar 1”. nia fundamenta

Aleinde ne’e, PDC mos iha programa ne’ebe oinsa atu desenvolve turismu komunitaria sira hodi kontribui ba rendimentu familiar no kria servisu ba joven sira iha Aileu

“PDC mos iha programa ida kona-ba desenvolve sitiu turiztiku sira iha Aileu, liliu turizmu komunitaria ne’ebe iha kada munispiu, ita nia joventude sira halo ho sira nia fundus rasik maibe sem hetan konhesimentu ba iha ita nia ministeriu turismu nian, governu mak hari tiha fatin turismu sira maibe sira la tau prioridade turismu komunitaria sira, entaun ita tenki desenvolve turizmu hodi kontribui ba rendimentu familiar”. nia sublinha

Iha fatin hanesan Koordenador PDC Munispiu Aileu, Natalino Mouzinho haktuir “juventude no komunidade Munispiu Aileu sei fo votus maioria ba PDC hodi manan iha eleisaun nune’e bele kria kampu servisu no desenvolve setor produtivu sira ho diak, mai hamutuk ita vota ba PDC hodi lori moris diak ba Aileu oan sira, dala barak ita hakilar katak ita mak joventude maibe ita nafatin sai joventude la ba oin,  ho ida ne’e ita tenki servisu makaas hodi fo vitoria ba PDC iha eleisaun tinan ne’e”. dehan Koordenador PDC Aileu Natalino Mouzinho

Entertantu, Mini Kampanha ne’e hetan partisipasaun masimu husi militante sira, observasaun husi CNE no mos parte seguransa PNTL  Postu Aileu Vila.

Jornalista : Lidia Amaral