PM Fumio Kongratula PM Xanana, Japaun Prontu Apoia Desenvolvimentu TL
SAPNewsTL, Dili : Primeiru-Ministru Japaun Fumio Kishida Kisida kongratula Primeiru Ministru Kay Rala Xanana Gusmão.
Karta ofisiál felisitasaun ne’e entrega direita hosi Ministru Estadu Negósiu Estranjeiru Japaun, TAKEI Shunsuke, durante hasoru malu ho Primeiru-Ministru, Kay Rala Xanana Gusmão iha Palasiu Governu Dili.
Iha enkontru armonia kuaze oras ida liu ne’e, Ministru Negósiu Estranjeiru Japaun sente orgullu tebes hodi reprezenta Xefe Governu Japaun vizita mai Timor-Leste entrega karta no Japaun kometimentu apoia nafatin dezenvolvimentu Timor-Leste iha setór hotu- hotu.
“Ha’u sente previleiju no ondradu hala’o vizita kortejia no troka ideia ho Primeiru-Ministru, Xanana Gusmão. Ha’u mós entrega diretamente karta kongratulasaun husi Primeiru-Ministru Fumio Kishida Kisida ba Primeiru-Ministru nu’udar agradesimentu ida no Japaun koopera nafatin ho Timor-Leste”, informa Ministru TAKEI.
Ministru TAKEI Shunsuke Japaun iha komprimisiu boot atu servisu hamutuk ho Governu atuál iha setór prioridade sira.
“Naturalmente Japaun ho Timor-Leste hanesan parseirus ne’ebé importante hodi partilla valores universais no ami gosta kolabora estreitamente ho Timor-Leste,” nia agradese.
Entretantu, durante enkontru, MNEK Japaun reafirma pozisaun Japaun apoia adezaun Timor-Leste adezaun ba Organizasaun Nasaun Sudeste Aziátiku (ASEAN).
Iha fatin hanesan, Primeiru-Ministru, Kay Rala Xanana Gusmão agradese ho kometimentu Governu Japonezes haruka kedas sira-nia Ministru Negósiu Estranjeiru mai Timor hodi deskute apoia hirak ne’ebé sei oferese no ekipa governu rua sei deskute klean liután ba oin.
“Ha’u agradese ohin simu Ministru Negosiu Estranejrus Japaun, ami deskute asuntu barak, ha’u seidauk bele koalia, maibé atu dehan Governu agora ne’e só bele sai líjimu depois aprova ninia programa tanba ne’e maka ami ko’alia apoia Japaun nian dezde uluk to’o agora, ha’u mós lahaluha grupu Parlamentár Japonéz agora mate hotu ona, ne’ebé uluk apoia ita durante funu,” Xanana apresia.
Xefe Governu reforsa tan, parte rua ko’alia mós kooperasaun ne’ebé halo no sei hatutan área foun maibé hafoin aprova tiha programa IX Governu nian.
“Sira husu programa Governu ne’e se bele karik fó ba Embaixadór Japaun iha Timor-Leste para sira mós hatene planu asaun anuál tinan 2024 para haree para bele apoia,” tenik nia.
Iha enkontru lideransa na’in rua konversa ho senseru saida de’it maka presiza serbisu hamutuk iha tinan sira-mai, tantu relasaun internasionál hanesan relasaun entre país rua.
Japaun nu’udar doador boot ne’ebé dezde Timor-Leste independensia too agora sempre apoia Timor-Leste dezenvolve infra-estrutura bazika sira hanesan estrada, irigasaun, ponte, bee moos no apoia rekursu umanu no seluk tan.
Enkontru ne’e Xanana Gusmão akompaña hosi Ministru Negósiu Estranjeiru no Kooperasaun, Bendito Freitas, Eis Embaixador Timor-Leste ba Singapura, Roberto Soares, Xefe Gabinete Primeiru Ministru, Elizabeth Exposto no Ministru Negósiu Estranjeiru Japaun akompaña hosi Embaixadór Japaun iha Timor-Leste, Tetsuya KIMURA no ekipa protokolu sira.
Jornalista : Lídia Amaral