Rejistrasaun Nakloke Ba Publiku, Strong Gym Sei Realiza “Dili Body Contest” Iha Fulan Maiu
Imajen: Informasaun Ba Rejistrasaun No Premiu Ba Manan Nain Sira Nian Ba Kompetisaun Dili Body Contest 2023.
SAPNewsTL, Dili: Strong Gym sei realiza kompetisaun “Dili Body Contest” ba daruak ho skala internasional iha loron 20 fulan maiu 2023 nune’e rejistrasaun sira nakloke ba publiku komesa iha loron 1 to’o 12 fulan maiu 2023 ho orsamentu montante komesa husi 25 USD to’o 40 USD ba kategoria lima Women Fitness Model, Super Beginner, New Muscle, Middle Muscle no Pro Muscle.
Imajen: Prezidente Komisaun Dili Body Contest 2023 Hendrik Uzia.
“Ami nia ekipa husi Strong Gym hetan sponsor husi loja Creative Furak ho Timor Plaza kontinua realiza Dili Body Contest ba dalaruak iha loron 20 fulan maiu 2023, ita nia objetivu husi kompetisaun ne’e atu buka atleta fini foun sira ne’ebe potensial lori ba partisipa kompetisaun internasional body Contes nian iha rai liur, komemora restaurasaun independensia Timor-Leste ba da-21 no aniversariu Strong Gym ba da-5”, dehan prezidente komisaun organizador Dili Body Contest Hendrik Uzia ba jornalista SAPNewsTL iha Strong Gym Bairro Formosa, Dili kuarta (12/04/2023).
Hendik hatutan, Dili Body Contest season dahuluk sira konsege hetan atleta potensial sira lori ba partisipa kompetisaun internasional body Contest nian iha Bali, Indonesia ne’ebe atleta sira hetan esperensia lubuk ona no Dili Body Contest sira realiza iha tinan ne’e ho skala internasional tanba konvida mos atleta sira husi Kupang, Soe, Atambua, Kefa, Flores no Sumba mai kompete iha kompetisaun ne’e no sira iha esperansa katak sei hetan partisipasaun ho suportasaun masimu husi Timoroan hotu nune’e kompetisaun ne’e sei lao ho diak hodi kontribui saude Timoroan sira nian
Nia informa, kompetisaun ida ne’e sira atu prepara atleta potensial foun sira atu nune’e lori sira ba kompete iha eventu internasional sira maski sira seidauk hetan informasaun ruma ba kompetisaun internasional Body Contest nian maibe sira iha espetativa katak iha Bali, Indonesia iha fulan agostu tinan ida ne’e sei iha kompetisaun internasional ba Body Contes.
Iha fatin hanesan koordenador tekniku João dos Reis hatete, sira nia kompetisaun ne’e nia rejistrasaun hahu iha loron 1 to’o 12 fulan maiu 2023, technical meeting sei realiza iha loron 13 fulan maiu 2023 iha Timor Plaza no kompetisaun sei akontese iha loron 20 fulan maiu 2023
Imajen: Koordenador Tekniku Dili Body Contest 2023 João dos Reis.
“Ami nia kompetisaun Dili Body Contest iha brosura ne’ebe ami fahe ona ba iha publiku, rejistrasaun hahu iha loron 1 to’o 12 fulan maiu 2023, technical meeting sei realiza iha loron 13 fulan maiu 2023 iha Timor Plaza no ami nia kompetisaun ne’e sei akontese iha loron 20 fulan maiu 2023”, tenik koordenador
Koordenador tekniku haforsa tan, relasiona ho konvite kuaze fahe hotu ona ba fatin gimnastiku sira iha Dili, Baucau, Lospalos, Same, suai, no konvite kategoria internasional ba atleta sira mai husi Kupang, Soe, Atambua, Kefa, Flores no Sumba mos sira distribui hotu ona hein konfirmasaun numeru hira husi ema sira hetan konvite ne’e no preparasaun lojistika lao hela tempu besik bele finaliza ona.
João akresenta tan, tarjetu ba atleta sira atu partisipa sira hakarak ema lokal minimu nain-200 no internasional minimu nain-20 maibe barak liu diak liu tan, nune’e sira bele hetan atleta potensial foun barak tanba iha tinan kotuk atleta sira partisipa hamutuk nain-130 ba kategria lima, Women Fitness Model, Super Beginner, New Muscle, Middle Muscle no Pro Muscle hein katak kompetisaun akontese iha loron 20 fulan maiu 2023 atleta sira kompete iha kada kategoria barak mak sae ba palku nune’e enkoraja atleta Timor oan sira atu kompete iha kompetisaun ne’e.
Reportajen: Augusto dos Santos