Taça Esperança 2023, ES CAFE Taibessi Ambisaun Manan Canossa
SAPNewsTL, Díli: Eskola Sekundaria CAFE Taibessi iha ambisaun boot hakarak manan eskola sekundaria Sta. Madalena Canossa iha jornada dahuluk Taça Esperança 2023.
“Ami nia preparasaun sufisiente ona atu hasoru ekipa adversariu eskola sekundaria Sta. Madalena Canossa no bazeia ba ami nia preparasaun no kondisaun jogador sira garante sei manan ami nia adversariu iha jogu dahuluk iha Taça Esperança 2023”, dehan treinador ekipa CAFE Taibessi Justino Ximenes liu husi konferensia imprensa ba jornalista sira iha Estadium Munisipal Dili kuarta (30/08/2023).
Justino hatutan, sira nia jogador sira prepara hotu para kompete iha jogu aban no sira jogador balun antes ne’e reforsa selesaun nasional Timor-Leste U-17 ba joga iha rai liur no jogador balun treinu iha Academia FFTL
Sentru treinamentu futebol juvenil iha kampu demokrasia mak sei reforsa ekipa husi eskola sekundaria CAFE Taibessi rasik.
Iha sorin seluk, treinador eskola sekundaria Sta. Madalena Canossa Cosme da Silva hatete, sira preparadu ona kontra adversariu no sei manan ho golu rua ba leten.
“Ami nia ekipa husi eskola sekundaria Sta. Madalena Canossa preparadu ona hasoru eskola sekundaria CAFE Taibessi iha jogu aban no ami garante manan adversariu ho golu rua ba leten maibe rezultadu ikus iha kampu mak determina”,
Cosme informa tan, sira jogador sira barak liu mai husi jogador kompete iha pra liga futsal no liga futsal daudaun ne’e nune’e sira garante sira jogador sei hetan pontu tolu iha jornada dahuluk Taça Esperança 2033
Entretantu jogu entre eskola sekundaria CAFE Taibessi kontra eskola sekundaria Sta. Madalena Canossa sei hala’o iha kampu demokrasia iha loron 31 fulan agostu 2023 tuku 16:00 loraik.
Jornalista: Augusto dos Santos