Tinan Barak La Halo Kampionatu Nasional, Policarpo Konsidera Prezidente FHACUPTIL La Iha Kunesimentu

SAPNewsTL, Dili: Atleta binaraga Policarpo dos S. Pereira konsidera prezidente Federasaun Halterfilizmu Kultural Fizika no Pezu Timor-Leste (FHACUPTIL sigla portuges) Vicente Carvalho la iha kuñesimentu tanba tinan barak ona la halo kampionatu nasional ba binaraga hodi promove atleta sira ba partisipa kompetisaun internasional sira iha rai liur.

“Iha tinan barak ona FHACUPTIL nunka halo kampionatu nasional ba binaraga nian maibe federasaun nunka iha klarifikasaun ba ami tanba saida maibe tuir hau nia hare’e prezidente FHACUPTIL Vicente Carvalho mak la iha kuñesimentu para realiza kampionatu nasional tanba nia laos ema ne’ebe iha kuñesimentu klean ba area binaraga nian”,dehan atleta binaraga Policarpo dos S. Pereira ba jornalista SAPNewsTL iha Mai Zone Sport Gym Hudilaran, Dili sabadu (18/03/2023).

Policarpo hatutan, nia husu ba SEJD karik bele halo binaraga nia federasaun ketak tiha atu nune’e ema ne’ebe iha kuñesimentu bele jere hodi nune’e atleta sira bele kompete iha kompetisaun internasional sira tanba bainhira ema ne’e nia background laos binaraga sei la komprende binaraga ne’e oinsa, atleta sira atu ba kompete eventu ne’e oinsa tanba atleta sira tenki iha osan boot no sakrifisiu foin bele kompete kompetisaun ida.

Nia akresenta, iha Timor-Leste bainhira iha kompetisaun binaraga nian halo husi Gym sira ne’e,  hare’e partisipasaun ema masimu tebes liuliu atleta binaraga idade joven sira maibe barak mak nia kuñesimentu sei menus tanba balun seidauk komprende atu uza ekipametu saida no han oinsa mak foin bele kompete kompetisaun, tan ne’e bainhira federasaun binaraga mak ketak tiha sira bele tur hamutuk fo kuñesimentu klean area binaraga ba malu, atu nune’e ema barak kuñese area binaraga bele ba kompete iha kompetisaun internasional sira iha rai liur lori Timor-Leste nia naran.

Atleta binaraga  informa, durante ne’e Gym sira mak halo fali kompetisaun ba atleta binaraga sira hanesan Strong Gym no Mai Zone Sport Gym hodi selebra sira nia aniversariu, agora iha Timor-Leste atleta binaraga komesa barak maibe bainhira FHACUPTIL la fo motivasaun ba sira ne’e susar tanba federasaun tenki iha inisiativa motiva sira hodi prepara ekipametu ba sira no fo treinu atu nune’e atleta sira ne’e reprezenta Timor-Leste partisipa kompetisaun internasional sira iha estranjeiru.

Reportajen: Augusto dos Santos