To’o Iha HNGV ! Assanami Apoia MS Foti Desizaun Nesesáriu Hola Aimoruk 

SAPNewsTL, Dili : Primeiru Ministru Interinu, Ministru Koordenador Asuntus Sosiais no Ministru Dezenvolvimentu Rural no Habitasaun Komunitáriu, Mariano Assanami Sabino to’o iha Hospital Nasional Guido Valadares (HNGV) haree diretamente situasaun reál ne’ebe deskonfia laiha stock aimoruk ne’ebe sufisiente no ema mate barak iha mortuariu.

Primeiru Ministru Interinu Mariano Assanami Sabino  hateten vizita ne’e atu fo akompanhamentu, apoia, monitoriza no avalia atividade sira ne’ebe  la’o durante ne’e.

“Mai iha ne’e  kualidade  hanesan ministru kordenador asuntu sosais hodi  sinkroniza, harmoniza  ba ministeiro  sira ne’ebe maka   iha ministru kordenador nia okos  i kontinua atu  halo monitorizaun,  avaliasaun no akonpanhamentu ba atividade”. Tenik Primeiru Ministru Interinu Mariano Assanami Sabino iha HNGV Bidau, 16/01/2024

Vice Primeiru Ministru no ministru koordenador asuntu sosial ne’e hatete, informasaun kona ba stock aimoru hotu, ema mate barak nakonu iha mortuariu, maibe aimoruk ne’e iha essensial, vitál no nesesáriu, aimoruk nesesáriu mak menuz, sosiedade tenki kompriende.

“Sosiedade barak ko’alia kona ba mortuariu ne’ebe nakonu  no etock aimoruk ne’e mak ohin ami mai haree.  stock aimoruk ne’ebe  iha aimoruk iha kategoria  tolu ida mak vital, esensial  no nesesáriu maibe aimoruk nesesáriu mak menuz ne’e sei fo apoia ba Ministériu Saude hodi hola desizaun ne’ebe nesesáriu hodi sosa aimoruk.” Nia sublinha

“Ita hanoin katak  sosiedade  mos tenki komprende katak Ministru Saude ne’e vital tebes  tanba ne’e maka  ohin hanesan  ministru kordenador  atu fo apoiu ba sira  para foti desizaun  sira ne’ebe  nesesariu para bele sosa aimoruk, funsionamentu nesesariu la’o ho normal no diak, uniku ospitál ne’ebe gratuita no fo esperansa ba  ema nia moris,”Dehan Assanami

Enkuantu, Hafoin vizita HNGV Primeiru Ministru Interinu ne’e mos hamutuk ho Ministra Saúde ba vizita SAMES hodi haree stock aimoruk ne’ebe rai hela iha armazenamentu SAMES nian.

Mariano Assanami mos fo parabens ba estrutura foun HNGV, Nia mos husu atu estrutura foun sira servisu ho lolos no hatudu prestasaun servisu tanba sai doutor ne’e la’os kampu servisu ida maibe sai vokasaun ne’ebe mak atu salva ema nia vida.

Ministériu Saúde mos sei kontinua buka dalan hodi rezolve stock aimoruk iha Timor-Leste, Portantu daudaun ne’e kompanha Sali-Magu mak halo doasaun aimoruk ba ospital sira.

Jornalista : Ermelinda Soares & Marciana da Conceição