UNTL La’os Fatin Vandalizmu, Asuntu Manifestasaun Manas Iha Públiku Nia Matan

SAPNewsTL,DILI- Universidade Nasional Timor Lorosa’e(UNTL) liu husi Assosiasaun Akademika Estudantil realiza konferensia imprensa relasiona ho atusaun PNTL ne’ebe mak halo pasta revista ba estudante sira iha arearores UNTL, Tuir porta voz Sejar João haktuir Membru PNTL ne’ebe mak ho fardadu tama ba areador resintu UNTL halo estudante sira barak trauma tanba aktu refere nu’udar presaun psikologia

“Relasiona ho prezensa membru PNTL ne’ebe okupa resintu UNTL,iha loron kuarta-feira, husi dadersan to’o meio-dia, ne’ebe ho fardadu no armadu hodi la’o ba mai iha kampus UNTL Central nia laran, halo pasagem iha sala Fakuldade Filosofia no agrikultura inklui pasa revista ba estudante sira ne’ebe atu tama ba kampus, aktu refere halo estudante inocente barak senti trauma, senti tauk inklui senti intiminadu ho aktu membru PNTL nian, tanba aktu refere ami konsidera nu’udar presaun psikologia no fo ameasa ba sirkulasaun estudante nian inklui halo estudante senti la livre iha sira nia fatin estudu UNTL Sentral”. dehan porta voz Sejar João ba Jornalista sira iha kampus sentral UNTL,Quinta-feira(17/11/2022)

Nia hatutan UNTL nu’udar instituisaun edukativa laos ema kriminozu, vandalismu,traidor no problematiku sira mak iha UNTL hodi Membru PNTL sira halo fali pasa revista ba estudante

“Ami husi Assosiasaun Akadémika Estudantil UNTL, hamutuk ho estudante UNTL tomak, hakarak deklara ba publiku, inklui ba Komando Geral PNTL no Magnifiku Reitor UNTL katak, ami lamenta tebes ho membru PNTL sira nia aktu hanesan pasa-revista ba estudante sira ne’ebe inosente,inklui halo pasagem ba koridor Fakuldade nian hodi kontrola estudante sira tanba ami estudante UNTL laos ema ne’ebe kriminozu, laos Vandalismu, laos traidor, laos problematiku no mos UNTL laos fatin problematiku no bandalismu, maibe UNTL nu’udar instituisaun edukativa ida hodi hanorin estudante atu sai kritiku no sai matenek”. Tenik nia

Porta voz ne’e akresenta tres pilares akademika ne’ebe estudante sira asumi hodi kontribui desenvolvimentu nasaun nian, ho aktu PNTL nia ne’ebe ba halo pasta revista iha aredor UNTL nia sira konsidera hamate demokrasia

“Atu kontribui ba dezenvolvimentu pais nian liu husi tres pilares akadémika ne’ebe estudante sira asumi (Ensinu, Peskija no Kontrolu Sosial), aleinde ida ne’e, ami mos konsidera aktu membru PNTL sira nian tenta atu hamate demokrasia kampus liu husi aparelu represivu estadu nian, la fo liberdade ba estudante sira ne’ebe nu’udar agente ba kontrolu sosial hodi uza autonomia kampus, atu manifesta no expressa estudante sira nia preokupasaun no lamentasaun ba desizaun politika ne’e foti husi lider politiku sira ne’ ebe tur iha orgaun de soberania, hodi uza osan povu nian iha ne’ebe la afavor ba interesse povu nian maibe so fo deit previlégiu no benefisiu ba grupo balun”.Porta voz salienta

Enkuantu, Assosiasaun Akadémika Estudantil UNTL exize ba komandu geral atu retira nia membru sira iha aredor Universidade Nasional Timor Lorosa’e hodi labele hata’uk estudante sira ne’e hala’o nia prosesu ensinu aprendijajem iha Kampus Sentral UNTL

Iha sorin seluk, Reitor UNTL João Soares Martins mos lamenta teb-tebes tanba iha ambitu manifestasaun refere vidru odamatan UNTL hetan estragus husi manifestante sira balu, tuir informasaun kazu refere iha ona prosesu investigasaun, portantu manisfestante tolunulu resin ne’ebe hetan kapturasaun husi PNTL hetan ona libertasaun husi Tribunal

Entretantu, Tuir Informasaun ne’ebe SAP News asesu iha debate OJE Parlamentu Nasional, Primeiru Ministru Taur Matan Ruak fundamenta, iha demostrasaun refere deskonfia ema lori granada tama iha manifestasaun, enkuantu, Tuir Magnfiku Reitor UNTL João Soares Martins lamenta ho atuasaun membru PNTL  ne’ebe ho forsa ba manisfestante sira inklui estudante sira iha Kampus Sentral UNTL

Tuir Planu manifestasaun ne’ebe Aliansa Maubere Nasional halo hodi ezije  Parlamentu Nasional kona-ba Halakon Lei Pensaun Vitalisia no altera lei nu. 1/2002 inklui hapara tradisaun sosa kareta foun no leilaun kareta tuan, manifestasaun refere sei la’o durante fulan rua husi Novembru to’o Dezembru, enkuantu kazu ne’ebe AMN kestiona seidauk hetan resposta husi PN, maske nune’e mai PN sei halo audiensia ho komisaun manifestasaun  iha semana oin

Jornalista : Anina Martins & Aquelina Taec

Editor        : Ekipa Editorial