Biografia ! Maktoban Aquelina Mangalhães Kontribuisaun Klean Ba SAPNewsTL
SAPNewsTL, Ermera : Biografia Maktoban Jornalista Aquelina Mangalhães desde niq moris to’o remata nia peregrinasaun iha mundu jornalismu, Maktoban refere nia kontribuisaun klean tebes ba mídia SAPNewsTL.
Biografia Aquelina Mangalhães
Aquelina Mangalhaes moris iha loron, 30 Fulan Setembru 1999, husi Aman Adelino Maia no inan Manuela Conceição Mangalhaes, Matebean nu’udar oan dahaat husi maun no bin alin nain 7 husi uma lisan Naomou Mougenu, Postu Letefoho Munisipiu Ermera.
Matebean Aquelina Mangalhaes hahu tama ba mundu edukasaun iha nivel Primariu iha Eskola Goulolo iha tinan 2008 to’o 2013, kontinua estudu iha pre-sekundaria Goulolo iha tinan 2014-2016, hala’o estudu sekundariu iha eskola ensinu tekniku vokasional Rai-laka Ermera 2017-2019, Iha tempu ne’ebe hanesan Matebean mos involve ativu iha Grupu Akolitos husi Parokia Letefoho durante tinan haat nia laran husi 2016-2019.
Hafoin finaliza nia estudu iha banku sekundaria, matebean kontinua tuir kursu Jornalizmu iha Grace For Development (GFD) iha tinan 2021 no estajiu profisional jornalismu durante fulan rua iha Radio Comunidade Comoro (RCC) iha kapital Dili.
Hafoin remata kursu Jornalizmu no estajiu profisional Matebean hamutuk ho nia maluk sira estudante universitariu, kursu profisional jornalismu no finalista sekundaria sira hanoin hamutuk hari’i no funda Media Juvenil Sa’ani Assamana Prazer News Timor-Leste (SAPNEWSTL) iha loron 26 Fulan Fevereiru tinan 2022.
Hafoin hari’i Midia Sapnewstl iha tinan 2022, Aquelina Mangalhães simu responsabilidade husi membru sira hodi sai xefe departamentu informasaun to’o ohin loron nia hakotu iiis iha nia rain moris fatin Postu Administrativu Letefoho Munisipiu Ermera iha loron 25 Fulan Dezembru 2023 tanba sofre moras.
Maktoban Jornalista Aquelina Mangalhães ninia kontribuisaun ba SAP News nian boot teb-tebes, sura labele, kontribuisaun ne’ebe klean no nunka atu haluha, tanba mídia ne’ebe hari’i husi juventude no estudante universitariu, laiha rekursu finanseira maibe ho deit ninia vontade no esperansa la’o hamutuk nafatin iha terus no susar nia laran to’o minutu ikus maromak mak bolu.
Maktoban Aquelina Mangalhães hanesan protagonista ida ba Midia SAP News TL, Aquelina Mangalhães ninia kontribuisaun ne’e boot teb-tebes ba Mídia Akadémika, Media Juvenil no media estudantil ida ne’e, ninia dedikasaun no kontribuisaun hotu ami la bele sura, no nunka atu haluha, Mídia ida hari’i laiha osan no hasoru situasaun difisil tebes, maibe Aquelina hamrik firme no servisu to’o minutu ikus maromak mak bolu hikas nia.
La to’o deit iha ne’e, matebean mos membru ativu husi Timor Leste Press Union (TLPU), iha ne’ebe sempre partisipa iha formasaun oioin ne’ebe liga ba mundu jornalismu, direitus humanus no edukasaun sidadania ba sosiedade Timor Lorosa’e.
Matebean Aquelinha Mangalhaes forma familia ka forma uma kain ho nia parseiru Leonito de Deus Maia husi uma lisan Leobessi Berdato, iha ne’ebe seidauk kous oan to’o ohin loron Matebean Aquelinha Mangalhaes husik Nia laen iha loron 25 Dezembru 2023.
Matebean mos sai membru Comisaun Nasional Eleisaun (CNE) hodi hala’o servisu ba eleisaun xefe suku durante fulan 2 iha tinan 2023.
Ami sura la bele ita nia Kontribuisaun hotu no ami nafatin konta ita nia Istoria. ita boot la mate, apenas muda deit ba mundu seluk, maibe ita nia ispíritu luta nafatin ho ami, ita ba ona, maibe ita boot rai no husik hela média ne’e ba ami, ami kompromete sei kontinua ita nia obra ne’e iha mundu ne’e, hakmatek iha maromak nia kadunan santu, boa viajem, ate um dia, adeus no adeus, obrigadu ba dedikasaun tomak”.
Suku Eraulo, Postu Letefoho, Munisipiu Ermera, 27 Dezembru 2023. Hakerek Na’in : Jornalista Ermelinda Soares