PN Deside Leilaun Karreta, Rede Feto Preokupa Ajente Kontrolu Sosial Sira Hahu Nonok
SAPNewsTL, Dili : Relasiona ho Politika Parlamentu Nasional (PN) hodi halo leilaun ba Karreta tuan sira, Organizasaun Sosidade Sivil liu husi Rede Feto Timor-Leste lamenta tebes ho Politika Parlamentu Nasional kada tinan 5 sempre troka maibe sira haluhan tiha povu sira mukit no halerik iha susar laran.
“Ha’u Lamenta tebes ho hanoin ne’ebe mak Presidente Parlamentu Nasional Ko’alia ho Primeiru Ministru, ita liga ba Parlamentu Nasionál hanesan orgaun ne’ebe reprezentante povu nia lian, ita hare’e katak kuaze kada mandatu iha desizaun Leilaun karreta Pajero no Prado ba membru Parlamentu Nasional Uza ba durasaun tinan 5 deit sempre troka kada tinan 5 Sosa fali foun,”Dehan Presidente Rede Feto Timor-Leste Zelia Fernandes ba jornalista iha fatin Salaun rede feto kaikoli Quarta Feira (31/05/2023)
Lider Rede Feto Timor Leste ne’e hatutan, ” Honestu Katak desde inisiu to’o ohin loron Rede Feto Timor-Leste preokupa kona ba situasaun ida ne’e, ita hare’e katak kuaze kada mandatu iha desizaun Lelaun kareta Pajero no Prado ba membru Parlamentu Nasional Uza ba durasaun tinan 5 deit, tanba sa ita la tau oan hodi haree ba infraestrutura sira, eskola sira, povu kiak sira nia presiza maibe ita tenki gasta osan ba karreta”.nia preokupa
Rede Feto Timor-Leste politika sosa karreta foun no leilaun karreta tuan ne’e prejudika gastus ne’ebe tuir lolos osan sira ne’e bele uza hodi halo Dezenvolvimentu hodi hadia estrada sira, eskola sira ne’ebe sala sei menus,kadeiras sei menus ba labarik sira, eletrisidade, haris fatin no be’e mos sei araska, maibe osan barak liu kuaze gasta hodi sosa kareta, maske karreta balun kondisaun diak hela.
Zelia mos preokupa tanba estudante universitariu sira ne’ebe sai kontrolu sosial hahu menuz, maibe injustisa sosial kontinua buras no desizaun politika sira barak la refleta ba interese povu nian, tanba kampu mak durante ne’e sempre hamoris kontrolu sosial ne’ebe bele influensia desizaun
“Kampus mak tenki haforsa kontrolu sosial, tanba tinan hira nia laran ne’e ajente kontrolu sosial hahu menuz, injustisa sira kontinua buras, tanba ne’e husu ba estudante universitariu sira atu labele nonok, wainhira ukun nain sira foti desizaun ne’ebe lalos”. nia husu
Entretantu, Zelia Fernandes husu ba governo foun no parte relavante Sira hotu iha futuru oin mai bele hadia ho diak no hodi desenvolve liu tan povu sira Nia Moris sai nabilan liu tan iha Nasaun doben ida ne’e.
Antes ne’e, Presidente Parlamentu Nasionàl (PN) Aneceto Gusterres hasoru malu ho Primeiru Ministru Taur Matan Ruak Iha Parlamentu Nasionàl, Iha Intervista Presidente PN Aneceto Gusterres, Haktuir Leilaun ba transporte ne’e hanesan jestaun do patrimoniu estadu ne’ebe kontribui hodi la hamosu despeza boot ba estadu tanba sosa karreta foun diak liu, duke uza karreta tuan
“Leilaun ba transporte iha oitavu governu nian kada tinan sempre mosu leilaun hodi sai hanesan gestaun do patrimoniu sei uza kareta tuan, halo despeza estadu nian sai boot liu tan ida ne’e mak ita hanaran halo gestaun sosa kareta foun diak liu duke uza kareta tuan halo despeza boot, ita rugi hela deit ho ida nee mak ita tenki troka laos ita mesak deit nasaun sira seluk mos hanesan mos ho ita nia nasaun,“.Dehan Presidente Parlamentu Nasional Aniceito Guterres iha resintu Parlamentu Nasionàl, 30/05/2023.
Jornalista : Ermelinda Soares