Realiza Divizaun Daruak No Datoluk LVTL Époka 2022, SEJD Parabeniza FVTL

SAPNewsTL, DILI : Sekretariu Estadu Juventude Desportu (SEJD) fo parabens ba Federasaun Voleibol Timor-Leste (FVTL) ne’ebe realiza divizaun daruak iha Dili no divizaun datoluk  epoka dahaat Liga Voleibol Timor-Leste (LVTL) iha munisipiu 11.

“Ha’u fo parabens ba FVTL ne’ebe simu dezafiu hodi realiza LVTL epoka 2022,  ha’u sente la fasil  eventu iha tinan ne’e ita halo diferente oituan kompetisaun husi munisipiu maka mai nasional ne’ebe divizaun datoluk  LVTL epoka dahaat realiza iha nivel munisipiu hotu  liu husi assosiasaun voleibol sira ne’ebe ekipa barak maka partisipa divizaun datoluk ne’e depois hetan ekipa kampiaun  iha munisipiu mai kompete  divizaun daruak iha nasional ne’ebe ohin ita remata ona ne’e hatudu katak bainhira ita halo ho diferensa ita hetan talentu oin-oin”, dehan SEJD Abrão Saldanha ba jornalista sira liu husi diskursu iha jogu final divizaun daruak LVTL epoka 2022 iha Jinajiu Desportu Caicoli, Dili tersa (13/12).

Sekretariu Estadu akresenta, bainhira partisipa husi ema barak kompetisaun aumenta liu tan  ne’e sei ezizi treinador no klube sira diak para buka jogador diak reforsa sira nia klube,  agradese ba asosisaun voleibol no servisu edukasaun munisipiu sira ne’ebe apoiu eventu sira iha munisipiu akontese to’o ohin loron no parabens ba ekipa sira ne’ebe partisipa iha LVTL epoka 2022 hein katak tinan oin sei iha divizaun dahuluk LVTL ne’ebe ekipa tolu husi  mane Choque, K-LINK, Bandido Qualidade no klube husi feto Assalam no Choque sa’e ba divizaun dahuluk LVTL iha epoka tuir mai.

Iha fatin hanesan Prezidente FVTL Inocencio Araújo hatete, atividade FVTL iha tinan ne’e divizaun datoluk LVTL realiza iha munisipiu 11 depois kampiaun mai kompete divizaun daruak iha Dili iha tinan ne’e

“Atividade FVTL iha tinan ida ne’e, ita realiza formasaun depois ita realiza divizaun datoluk LVTL iha munisipiu 11 depois ekipa sira kampiaun iha munisipiu mak mai partisipa divizaun daruak iha Dili, ohin loron final ona ekipa mane husi Choque mak sai kampiaun no feto ekipa Assalam mak sai kampiaun ne’ebe rezultadu ne’e mak iha sira hahu dezenvolve modalidade voleibol iha munisipiu sira mai iha nivel nasional ne’ebe partisipasaun masimu husi volibolista sira liuliu juventude sira iha munisipiu”, Inocencio hateten

Prezidente hatutan, hahu realiza divizaun datoluk husi munisipiu sira mai to’o divizaun daruak iha nasional ne’e partisipasaun iha munisipiu 11 ekipa hamutuk 98 depois sira ne’ebe kampiaun mai kompete iha Dili hamutuk ekipa 10 ne’ebe hamutuk ekipa iha divizaun daruak epoka kotuk ba ne’e ekipa mane hamutuk 18 no feto hamutuk 17 ne’ebe kompete iha divizaun daruak iha nasional iha tinan ne’e, nune’e sei foti ekipa mane tolu no feto rua ba divizaun dahuluk LVTL iha tinan oin.

Nia afrima, orsamentu ne’ebe Federasaun apoiu ba kompetisaun ida ne’e hamutuk 50,000 USD apoiu mai husi SEJD ne’ebe tinan oin tama ba divizaun dahuluk LVTL epoka dahaat 2023 sira sei halo proposta orsamentu ba SEJD para fo apoiu atu bele realiza kompetisaun ne’e.

“Orsamentu ne’ebe ami apoiu ba kompetisaun ida ne’e hamutuk 50,000 USD apoiu mai husi SEJD ne’ebe tinan oin  ita tama ba divizaun dahuluk LVTL epoka dahaat 2023, ami sei halo proposta orsamentu ba SEJD para fo apoiu atu nune’e ita bele realiza kompetisaun ne’e”, tenik prezidente

Reportajen : Augusto dos Santos