SEJD & CTFJTL Realiza Festival Kompetisaun Futebol Juvenil U-16 Ba Munisipiu 7

SAPNewsTL, DILI: Sekretariu Estadu Juventude Desportu (SEJD) no Sentru Treinamentu Futebol Juvenil Timor-Leste (CTFJTL sigla portuges) realiza festival no kompetisaun futebol ba munisipiu hitu, nune’e bele hetan futuru jogador ba selesaun Juvenil Timor-Leste prepara ba jogu internasional sira iha fururu.

“Ohin ita realiza festival no kompetisaun futebol juvenil U-16 ne’ebe partisipa husi munisipiu 7, Lautem, Baucau, Dili, Liquisa, Ermera, Covalima no Bobonaru ne’ebe festival ne’e ita komesa iha loron 12 fulan dezembru no sei remata iha loron 17 fulan dezembru 2022 ne’ebe hetan apoiu masimu husi ita nia governu liu husi SEJD no patrosinador sira”, dehan prezidente komisaun Maria Canosa Soares ba jornalista sira liu husi nia diskursu iha Estadium Munisipal Dili segunda (12/12).

Prezidente komisaun akresenta, kompetisaun ne’e partisipa husi jogador nain-144,  treinador nain ualu,  asintente treinador nain ualu husi munisipiu 7 ne’ebe eventu hetan apoiu masimu husi  SEJD  ho orsamentu  montante 30, 525, 50 USD ba akomodasaun, transporte no konsumu ba  ekipa sira no sira mos sei prepara premiu ba festival husi manan nain dahuluk, daruak no datoluk no ba kompetisaun futebol juvenil U-16 sira prepara mos premiu ba manan nain dahuluk, daruak, datoluk, mellor markador, jogador,  baliza no ekipa, eventu ne’e mos hetan apoiu husi patrosinador hanesan creative furak, strong Gym no Timor Plaza.

Iha fatin hanesan SEJD Abrão Saldanha hatete, antes sira atu mai kompete iha nasional sira halo ona kompetisaun iha idak-idak nia munisipiu ne’ebe bainhira kompetisaun ne’e la’o maka hetan jogador talentu diak sira bele tama selesaun nasional juvenil nian no bele halo estajiu profesional iha rai seluk hanesan iha tinan kotuk nian ne’ebe hetan ona jogador nain rua husi munisipiu Baucau atu ba treinu iha Brazil

“Antes ekipa sira  to’o mai kompete nasional sira halo tiha kompetisaun iha idak-idak nia munisipiu ne’ebe kompetisaun agora ne’e  ita halo iha loron neen nia laran tanba ekipa partisipa hamutuk ualu husi munisipiu hitu no bainhira kompetisaun la’o ita sei halo selesaun  jogador juvenil sira ne’ebe karik iha jogador talentu diak bele tama ita nia selesaun nasional juvenil nian para prepara ba jogu selesaun nasional nian tuir programa iha FFTL no mos bele ba halo estajiu profesional iha rai seluk hanesan tinan kotuk ne’ebe ita hetan jogador nain rua husi munisipiu Baucau ne’ebe atu treinu iha nasaun Brazil karik ba iha ne’eba treinador Brazil laran monu bele halo kontratu ho jogador sira ne’e”, tenik Abrão

Iha sorin seluk treinador sentru treinamentu juvenil Munisipiu Lautem Bento Savio dos S.  Conceicão dehan, ohin abertura nia sente kapas tebes tanba ekipa rua husi Dili mak halo jogu abertura ne’ebe bele fo esperensia ba jogador sira husi munisipiu sira

“Ohin abertura ha’u sente kapas tebes tanba ekipa rua husi munisipiu Dili nian mak joga  ne’ebe ami nia jogador sira husi munisipiu bele aproveita sira nia esperensia atu nune’e aban bainrua ami nia jogador sira bele  joga diak mos”, Bento hateten

Bento informa,  nia esperansa nu’udar treinador hakarak ekipa tama ba faze final maibe bola ne’e kabuar minutu 90 mak determina karik lakon nu’udar treinador sei haree tanba saida mak lakon no tenki simu realidade lakon iha jogu no nia preokupasaun ba governu mak tenki haree sentru Juvenil sira munisipiu sira nia difikuldade ba kampu, ekipamentu ba jogador treinu, treinador nian no fasilita bola ne’ebe diak ne’ebe maski iha munisipiu sira hetan difikuldade maibe la hamate sira vontade hodi fo treinu jogador juvenil sira tanba nia mos uluk jogador maka mai treinador.

Reportajen : Augusto dos Santos